എല്ലാവരും ജോലിക്കായി തിരയുന്ന ഇടമാണ് ലിങ്ക്ഡ് ഇൻ. അതേ ഇടത്തു തന്നെ ജോലി നേടി കൊണ്ട് വൻ നേട്ടം സ്വന്തമാക്കിയിരിക്കുകയാണ് ഒരു 21 വയസ്സുകാരി. ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്‌നോളജി (ഐഐഐടി) – ഉനയിലെ വിദ്യാർത്ഥിയായ മുസ്കാൻ അഗർവാൾ ആണ് ഈ ശ്രദ്ധേയ നേട്ടം കൈവരിച്ചിരിക്കുന്നത്. 60 ലക്ഷം രൂപ വാർഷിക ശമ്പളം വാഗ്ദാനം ചെയ്താണ് ലിങ്ക്ഡ് ഇൻ മുസ്‌കാന് ജോലി ഓഫർ ചെയ്തിരിക്കുന്നത്.
ഉത്തർപ്രദേശിലെ ഹത്രാസ് സ്വദേശിയാണ് മുസ്കാൻ അഗാർവാൾ. ഐഐഐടി ഉനയിൽ നിന്ന് ഇലക്ട്രോണിക്‌സ് ആൻഡ് കമ്മ്യൂണിക്കേഷൻ എഞ്ചിനീയറിംഗിൽ ബിടെക് പൂർത്തിയാക്കിയ ഈ പെൺകുട്ടിക്ക് ഈ സ്വപ്ന ജോലി ഓഫർ ലഭിച്ചിരിക്കുന്നത്. ഐഐഐടി ഇൻസ്റ്റിറ്റ്യൂട്ടിലെ ഒരു വിദ്യാർത്ഥിക്ക് ലഭിച്ച ഏറ്റവും ഉയർന്ന ശമ്പള പാക്കേജുമായി പുതിയ റെക്കോർഡ് ആണ് ഈ പെൺകുട്ടി നേടിയിരിക്കുന്നത്.
‘ടോപ്പ് വുമൺ കോഡർ’മാർക്കുള്ള ‘ഗീക്ക് ഗോഡസ്’ എന്ന മത്സരത്തിൽ പങ്കെടുത്ത് വിജയിച്ചതോടെയാണ് മുസ്കാന്റെ ജീവിതത്തിൽ വഴിത്തിരിവുണ്ടാകുന്നത്. 69,000 വനിതാ കോഡർമാർ പങ്കെടുത്ത ഈ മത്സരത്തിൽ മുസ്കാൻ ആണ് ഒന്നാം സ്ഥാനം കരസ്ഥമാക്കിയത്. ഇന്ത്യയിലെ ഏറ്റവും വലിയ ടെക്‌നോളജി കമ്മ്യൂണിറ്റിയായ ടെക്‌ഗിഗ് സ്ത്രീകൾക്ക് മാത്രമായി നടത്തുന്ന വാർഷിക കോഡിംഗ് മത്സരമാണ് ഗീക്ക് ഗോഡസ്. ഇടവേളകളില്ലാതെ നാലുമണിക്കൂറിലേറെ നേരം കോഡിംഗിൽ ഏർപ്പെട്ടിട്ടാണ് മുസ്കാൻ ഈ മത്സരത്തിൽ ഒന്നാമത് എത്തിയത്. ഒന്നരലക്ഷം രൂപയായിരുന്നു ഒന്നാം സമ്മാനത്തുകയായി അന്ന് മുസ്‌കാന് ലഭിച്ചത്.
എന്നാൽ ഈ ഒന്നാം സ്ഥാനം, മുസ്കാന്റെ ജീവിതത്തെ തന്നെ മാറ്റിമറിച്ചു. 2022-ൽ, ഹാർവാർഡ് യൂണിവേഴ്‌സിറ്റിയിലെ ബിരുദ വിദ്യാർത്ഥിനികൾ സംഘടിപ്പിച്ച ലോകത്തിലെ ഏറ്റവും വലിയ വിദ്യാർത്ഥികളുടെ ടെക് കോൺഫറൻസായ WECode-ൽ പങ്കെടുത്ത മുസ്കാൻ ഒരു ഹാർവാർഡ് WECode സ്കോളർ എന്ന അംഗീകാരവും നേടി. ഒടുവിൽ ലിങ്ക്ഡ്ഇന്നിന്റെ മെന്റർഷിപ്പ് പ്രോഗ്രാമിലേക്കുള്ള മികച്ച 40 സ്ത്രീകളിൽ ഒരാളായി അവളെ തിരഞ്ഞെടുത്തു. 60 ലക്ഷം രൂപ വാർഷിക ശമ്പളത്തിലാണ് ലിങ്ക്ഡ് ഇൻ മുസ്‌കാനെ സ്വന്തമാക്കിയിരിക്കുന്നത്.
Discussion about this post