ന്യൂഡല്‍ഹി:ദേശീയ തലസ്ഥാനത്ത് വായു മലിനീകരണ തോത് വളരെ മോശമായ നിലയില്‍ തുടരുന്നു. വരും ദിവസങ്ങളിലും വായുവിന്റെ ഗുണനിലവാരത്തില്‍ കാര്യമായ പുരോഗതികള്‍ സംഭവിക്കില്ലെന്നാണ് വിദഗ്ധരുടെ വിലയിരുത്തല്‍. എയര്‍ ക്വാളിറ്റി ആന്റ് വെതര്‍ ഫോര്‍കാസ്റ്റിംഗ് ആന്‍ഡ് റിസര്‍ച്ച് പ്രകാരം വായു ഗുണ നിവലാരം 323 ആയി .
ഐഐടി ഡല്‍ഹിയിലെ എക്യുഐ 321, എയര്‍പോര്‍ട്ട് (ടെര്‍മിനല്‍ 3) ഏരിയ 336, പുസ 337 എന്നിങ്ങനെയാണ് വായു ഗുണ നിലവാരം രേഖപ്പെടുത്തിയിരിക്കുന്നത്. സെന്‍ട്രല്‍ പൊല്യൂഷന്‍ കണ്‍ട്രോള്‍ ബോര്‍ഡിന്റെ (സിപിസിബി) കണക്കനുസരിച്ച്, രാവിലെ 7:41 ന്, ആനന്ദ് വിഹാറില്‍ എ.ക്യുഐ 358 , ജഹാംഗീര്‍പുരിയില്‍ 399, ലോധി റോഡില്‍ 315, ന്യൂ മോട്ടി ബാഗില്‍ 370 എന്നിങ്ങനെയാണ്് രേഖപ്പെടുത്തിയിരിക്കുന്നത്.
0 മുതല്‍ 100 വരെയുള്ള വായു ഗുണനിലവാര സൂചിക നല്ലതായി കണക്കാക്കപ്പെടുന്നു, അതേസമയം 100 മുതല്‍ 200 വരെ മിതമായതും 200 മുതല്‍ 300 വരെ മോശവുമാണ്, 300 മുതല്‍ 400 വരെ വളരെ മോശമാണെന്നും 400 മുതല്‍ 500 വരെ അതിലധികമോ ഗുരുതരമായോ കണക്കാക്കുന്നു.
അന്തരീക്ഷ മലിനീകരണത്തിന്റെ തോത് വര്‍ധിച്ചതിന് പിന്നാലെ ലീനിയര്‍ പ്രൊജക്ടുകളുമായി ബന്ധപ്പെട്ട നിര്‍മാണ പ്രവര്‍ത്തനങ്ങള്‍ നിരോധിക്കുന്നതിനും മലിനീകരണം ഉണ്ടാക്കുന്ന ട്രക്കുകള്‍ ഡല്‍ഹിയിലേക്ക് പ്രവേശിക്കുന്നതിനും ഡല്‍ഹി സര്‍ക്കാര്‍ നിരോധനം ഏര്‍പ്പെടുത്തിയിരുന്നു. എന്നാല്‍, ശനിയാഴ്ചയോടെ അനുകൂലമായ കാറ്റിന്റെ വേഗതയും ദിശയും കാരണം കര്‍ശന നിയന്ത്രണങ്ങള്‍ സര്‍ക്കാര്‍ പിന്‍വലിച്ചിരുന്നു.
