ഹൈദരാബാദ്: ലോകത്തിലെ ആദ്യ 3ഡി പ്രിന്റഡ് ക്ഷേത്രം ഭാരതത്തിൽ ഒരുങ്ങുന്നു. സിദ്ധിപേട്ട് ജില്ലയിലെ ബുരുഗുപള്ളിയിലാണ് ക്ഷേത്രം ഉയരുന്നത്. 4,000 ചതുരശ്ര അടിയിൽ 35.5 അടി ഉയരമുള്ള മൂന്ന് ഭാഗങ്ങളായാണ് ഗണപതി ക്ഷേത്രം നിർമിച്ചിരിക്കുന്നത്.
ഹൈദരാബാദ് ആസ്ഥാനമായുള്ള അപ്സുജ ഇൻഫ്രാടെക് എന്ന കമ്പനിയാണ് നിർമാണത്തിന് ചുക്കാൻ പിടിക്കുന്നത്. ഗണപതിയുടെ ഇഷ്ടവിഭവമായ ‘മോദകം’ ആകൃതിയിലുള്ള മൂന്ന് ശ്രീകോവിലുകളാണ് ഉള്ളത്. ചതുരാകൃതിയിലുള്ള ശിവാലയവും താമര ആകൃതിയിൽ പാർവതി ദേവിയുടെ ശ്രീകോവിലും ഉൾക്കൊള്ളുന്നതാണ് ക്ഷേത്രം.
പദ്ധതിക്കായി 3ഡി പ്രിന്റ് നിർമാണക്കമ്പനിയായ സിംപ്ലിഫോർജ് ക്രിയേഷൻസിന്റെ സഹായം അപ്സുജ ഇൻഫ്രാടെക് തേടിയിരുന്നു. തദ്ദേശീയമായി വികസിപ്പിച്ചെടുത്ത മെറ്റീരിയലും സോഫ്റ്റ് വെയറും ഉപയോഗിച്ചാണ് ക്ഷേത്രനിർമാണത്തിനുള്ള 3ഡി സാങ്കേതിക വിദ്യ വികസിപ്പിച്ചത്. തൂണുകൾ, സ്ലാബുകൾ, ഫ്‌ലോറിംഗ് തുടങ്ങിയ ശേഷിക്കുന്ന ഘടനകൾ പരമ്പരാഗത നിർമ്മാണ സാങ്കേതിക വിദ്യകൾ ഉപയോഗിച്ചാണ് നിർമ്മിച്ചിരിക്കുന്നതെന്ന് ഇവർ പറഞ്ഞു.
മൂന്ന് മാസങ്ങൾ എടുത്താണ് ക്ഷേത്രസമുച്ചയത്തിന്റെ ത്രീഡി പ്രിന്റിംഗ് പൂർത്തിയായത്. ക്ഷേത്ര നിർമാണത്തിന്റെ എല്ലാ രീതിയും പാലിച്ചാണ് 3 ഡി പ്രിന്റിംഗിൽ ക്ഷേത്രത്തിന്റെ ഘടന ഒരുക്കിയതെന്ന് സിംപ്ലിഫോർജ് ചീഫ് ഓപ്പറേറ്റിംഗ് ഓഫീസർ (സിഒഒ) അമിത് ഗുലെ പറഞ്ഞു.
