തിരുവനന്തപുരം: മുഖ്യമന്ത്രിയെയും മന്ത്രിമാരെയും കാണാൻ കുട്ടികളെ വഴിയിൽ പൊരിവെയിലിൽ നിർത്തിയ സംഭവത്തെ ന്യായീകരിച്ച് ജോൺ ബ്രിട്ടാസ് എംപി. മുഖ്യമന്ത്രിയെ കാണാൻ കുട്ടികൾ നിൽക്കുന്നത് അത്രവലിയ അപരാധം അല്ലെന്ന് ബ്രിട്ടാസ് ഫേസ്ബുക്കിൽ കുറിച്ചു. സംഭവത്തെ സങ്കുചിതമായ രാഷ്ട്രീയത്തിന്റെ കണ്ണിലൂടെ നോക്കി കാണേണ്ട കാര്യമില്ലെന്നും അദ്ദേഹം കൂട്ടിച്ചേർത്തു. ബുധനാഴ്ച പാർലമെന്റ് കാണാൻ എത്തിയ കുട്ടികളുടെ ചിത്രം പങ്കുവച്ചുകൊണ്ടായിരുന്നു ജോൺ ബ്രിട്ടാസിന്റെ പ്രതികരണം.
ഫേസ്ബുക്ക് കുറിപ്പിന്റെ പൂർണരൂപം
ഇന്നലെ, ബുധനാഴ്ച രാവിലെ 11 മണിക്ക് പാർലമെന്റിന് മുമ്പിൽ നിന്നുള്ള ദൃശ്യങ്ങളാണ്. പാർലമെന്റ് മന്ദിരം കാണാൻ സ്‌കൂൾ കുട്ടികൾ വരി നിൽകുകയാണ്. ഇന്നലെ എവിടെയെങ്കിലും അവധിയുള്ളതായി അറിയില്ല. രാജ്യത്തിന്റെ ഭാഗധേയം നിർണയിക്കപ്പെ ടുന്ന, ജനാധിപത്യത്തിന്റെ ശ്രീകോവിൽ കാണാൻ കുട്ടികൾ വരുന്നതിൽ യാതൊരു അപാകതയും ഇല്ലെന്ന് മാത്രമല്ല അത് പ്രോത്സാഹിപ്പിക്കപ്പെടേണ്ടതും കൂടിയാണ്.
ലോകജനാധിപത്യ ചരിത്രത്തിൽ ആദ്യമായി ഒരു മന്ത്രിസഭ മുഖ്യമന്ത്രിയുടെ നേതൃത്വത്തിൽ സഞ്ചരിക്കുമ്പോൾ അവരെ കേൾക്കാനും കാണാനും സ്‌കൂൾ കുട്ടികൾ വന്നതും വരി നിന്നതും മഹാഅപരാധമായി ചിത്രീകരിക്കുന്നത് കൊണ്ടാണ് ഈ കുറിപ്പ് എഴുതുന്നത്. സഞ്ചരിക്കുന്ന ക്യാബിനറ്റിലുള്ളവർ നമ്മുടെ സംസ്ഥാനത്തിന്റെ ഭരണസാരഥികളാണ്. സങ്കുചിതമായ രാഷ്ട്രീയത്തിന്റെ കണ്ണിലൂടെ നോക്കി കാണേണ്ട കാര്യമില്ല.
Discussion about this post