കൊച്ചി : മലയാളികളുടെ ആഘോഷമായി മാറിയ സിനിമയാണ് ബൈംഗ്ലൂര് ഡെയ്സ്. യുവാക്കളെ ഹരം കൊള്ളിച്ച നിരവധി ബൈക്ക് റേസിംഗ് സീനുകളും ചിത്രത്തിലുണ്ടായിരുന്നു. എന്നാല് ചിത്രത്തിലെ ഏറ്റവും പ്രധാനമായ ക്ലൈമാക്സ് രംഗത്തില് റേസര് ആയി എത്തിയത് നടന് ദുല്ഖര് സല്മാനല്ലെന്ന വെളിപ്പെടുത്തലുമായി എത്തിയിരിക്കുകയാണ് ബാംഗ്ലൂര് ഡെയ്സിന്റെ സംവിധായിക അഞ്ജലി മേനോന്. ആ രംഗത്തിനായി ഷൂട്ട് ചെയ്തിരിക്കുന്നത് യഥാര്ത്ഥ സൂപ്പര് ക്രോസ് റേസിംഗ് മത്സരമാണെന്ന് അഞ്ജലി വെളിപ്പെടുത്തി.
അങ്ങനെയൊരു റേസ് സെറ്റിട്ട് ചെയ്യാനുള്ള ബജറ്റ് ആ സമയത്ത് ഇല്ലായിരുന്നുവെന്നും അതുകൊണ്ട് തന്നെ പൂനെയില് നടന്ന റേസിംഗ് മത്സരമാണ് ക്ലൈമാക്സില് കാണിക്കുന്നതെന്നും അഞ്ജലി മേനോന് പറഞ്ഞു. ‘ബാംഗ്ലൂര് ഡെയ്സിന്റെ ക്ലൈമാക്സില് ചിത്രീകരിച്ചിരുന്ന വലിയൊരു റേസ് ഉണ്ട്. സത്യത്തില് അങ്ങനെയൊരു റേസ് ചിത്രീകരിക്കാനുള്ള ബജറ്റ് ആ സമയത്ത് ഞങ്ങളുടെ കയ്യില് ഉണ്ടായിരുന്നില്ല എന്നതാണ് സത്യം. അങ്ങനെയാണ് ആ സമയത്ത് പൂനെയില് ഇതുപോലൊരു സൂപ്പര്ക്രോസ് ടൂര്ണമെന്റ് നടക്കുന്നുണ്ടെന്ന കാര്യം ഞങ്ങള് അറിയുന്നത്. വൈകിട്ട് ഏഴ് മണി മുതല് പത്ത് മണി വരെയാണ് സൂപ്പര്ക്രോസ് റേസ് നടക്കുന്നത്. അന്നത്തെ ദേശീയ ചാംപ്യനായ അരവിന്ദ് കെപിയെ കണ്ട് ഞങ്ങള് കാര്യം പറഞ്ഞു.
അങ്ങനെയാണ് ദുല്ഖര് സല്മാന് ചെയ്ത അജു എന്ന കഥാപാത്രമായി അരവിന്ദിനെയാണ് റേസില് ഷൂട്ട് ചെയ്യാന് തീരുമാനിക്കുന്നത്. അങ്ങനെ അവിടെയെത്തി റേസ് ചിത്രീകരിക്കാനുള്ള തയാറെടുപ്പുകളൊക്കെ നടത്തി. നിര്ഭാഗ്യവശാല് ആദ്യ റേസില് അരവിന്ദ് പരാജയപ്പെട്ടു. എനിക്കും ആകെ വിഷമമായി. നമ്മുടെ ഹീറോയാണ് അയാള്. അദ്ദേഹം പരാജയപ്പെട്ടാല് ഇനി എന്തു ചെയ്യുമെന്ന് അറിയില്ല. ആകെ രണ്ട് റേസ് ആണ് അരവിന്ദിനുണ്ടായിരുന്നത്, ആദ്യ റേസും അവസാന റേസും. ഞങ്ങളുടെ ക്യാമറാമാനും ആവേശത്തിലായിരുന്നു. മുഴുവന് ഫോക്കസും അരവിന്ദിനു നേരെയായിരുന്നു.
ലാസ്റ്റ് റേസ് ആണ് പിന്നീട് ഷൂട്ട് ചെയ്യേണ്ടിയിരുന്നത്. ഭാഗ്യവശാല് ക്യാമറ ക്രൂ അത് കൃത്യമായി പ്ലാന് ചെയ്തു. അങ്ങനെ ഭാഗ്യം കൊണ്ട് ഞങ്ങള് ചിത്രീകരിച്ച ആ ലാസ്റ്റ് റേസില് അരവിന്ദ് വിജയിച്ചു. അതേ കഥാപാത്രം തോല്ക്കുകയും ജയിക്കുകയും ചെയ്യുന്ന ഫൂട്ടേജ് അവിടെ നിന്നും ലഭിച്ചു. ഞങ്ങള് അത് ഒരുമിച്ച് എഡിറ്റ് ചെയ്താണ് ചിത്രത്തില് ഉപയോഗിച്ചത്. റേസിന്റെ തുടക്കം അജു പരാജയപ്പെടുന്നതായും പിന്നീട് അവന് മത്സരത്തില് തിരികെ വന്ന് അവസാനം വിജയിക്കുന്നതായും കാണിക്കാന് സാധിച്ചു. സത്യത്തില് അതൊരു വലിയ ഭാഗ്യമായി കാണുന്നു. ആ ക്ലൈമാക്സില് കാണുന്നതെല്ലാം റിയല് ലൈഫ് ഫൂട്ടേജ് ആണ്’ അഞ്ജലി മേനോന് പറഞ്ഞു.
Discussion about this post