തലയുയർത്തി തലൈവർ; പാർട്ടി ആസ്ഥാനത്ത് പ്രവർത്തകരെ അഭിസംബോധന ചെയ്യാൻ നരേന്ദ്ര മോദി

ന്യൂഡൽഹി: ഹിന്ദി ഹൃദയഭൂമിയിലെ ചരിത്ര വിജയത്തിന്റെ പശ്ചാത്തലത്തിൽ പ്രധാനമന്ത്രി നരേന്ദ്ര മോദി ഇന്ന് ബിജെപി പ്രവർത്തകരെ അഭിസംബോധന ചെയ്യും. ഡൽഹിയിലെ പാർട്ടി ആസ്ഥാനത്ത് വൈകുന്നേരം 6.30നാണ് പ്രധാനമന്ത്രി പാർട്ടി പ്രവർത്തകരെ കാണുക. ബിജെപിയുടെ ഔദ്യോഗിക ആഘോഷ പരിപാടികൾ വൈകുന്നേരം 5.00 മണിക്ക് ആരംഭിക്കും.

മദ്ധ്യപ്രദേശിലും രാജസ്ഥാനിലും എതിരാളികളെ ബഹുദൂരം പിന്നിലാക്കി ബിജെപി ചരിത്ര വിജയം നേടിയപ്പോൾ, ഛത്തീസ്ഗഢിൽ അഭിപ്രായ സർവേകളെ പോലും മലർത്തിയടിച്ച വിജയത്തിലേക്കാണ് പാർട്ടി നീങ്ങുന്നത്.

നിലവിൽ മദ്ധ്യപ്രദേശിൽ 136 സീറ്റുകളിൽ ബിജെപി മുന്നിട്ട് നിൽക്കുമ്പോൾ 93 സീറ്റുകളിലാണ് കോൺഗ്രസ് മുന്നേറ്റം. രാജസ്ഥാനിൽ 113 സീറ്റുകളിലാണ് ബിജെപി മുന്നിട്ട് നിൽക്കുന്നത്. 70 സീറ്റുകളിൽ മാത്രമാണ് കോൺഗ്രസിന് മേൽക്കൈ. ഛത്തീസ്ഗഢിൽ 50 സീറ്റുകളിൽ ബിജെപിയും 38 സീറ്റുകളിൽ കോൺഗ്രസുമാണ് മുന്നിൽ. തെലങ്കാനയിൽ 66 സീറ്റുകളുമായി കോൺഗ്രസ് മുന്നിൽ നിൽക്കുമ്പോൾ 39 സീറ്റുകളിൽ ബി ആർ എസും 10 സീറ്റുകളിൽ ബിജെപിയും മുന്നിട്ട് നിൽക്കുന്നു.