കൊല്ലം: അച്ചൻകോവിൽ കാട്ടിൽ അകപ്പെട്ട വിദ്യാർത്ഥികളെ രക്ഷപ്പെടുത്തി. പുലർച്ചെയോടെയാണ് ഇവരെ രക്ഷപ്പെടുത്തി സുരക്ഷിത സ്ഥാനത്തേക്ക് മാറ്റിയത്. 27 വിദ്യാർത്ഥികളും രണ്ട് അദ്ധ്യാപകരുമാണ് കാട്ടിൽ അകപ്പെട്ടത്.
ക്ലാപ്പന ഷൺമുഖ വിലാസം ഹയർസെക്കൻഡറി സ്കൂളിലെ അദ്ധ്യാപകരും വിദ്യാർത്ഥികളുമാണ് ഇവർ. ഇന്നലെയാണ് ഇവർ കാട്ടിൽ അകപ്പെട്ടത്. സ്കൗട്ട് & ഗൈഡ്സിൽ ഉൾപ്പെട്ട വിദ്യാർത്ഥികളായ ഇവരെ കാട് കാണിക്കാൻ കൊണ്ടുവന്നതായിരുന്നു അദ്ധ്യാപകർ.
പകൽ 11 മണിയോടെയായിരുന്നു ഇവർ കാട്ടിനുള്ളിലേക്ക് കയറിയത്. എന്നാൽ ശക്തമായ മഴയെ തുടർന്ന് ഇവർക്ക് തിരിച്ചിറങ്ങാൻ കഴിഞ്ഞില്ല. ഇതോടെ വനത്തിൽതന്നെ കുടുങ്ങുകയായിരുന്നു. തുടർന്ന് നാട്ടുകാരും പോലീസും വനംവകുപ്പ് ഉദ്യോഗസ്ഥരും ചേർന്ന് ഇവരെ പുറത്തെത്തിക്കാനുള്ള ശ്രമം ആരംഭിച്ചു.
10 മണിക്കൂറോളം നീണ്ട പരിശ്രമത്തിനൊടുവിലാണ് ഇവരെ പുറത്ത് എത്തിച്ചത്. രാത്രി മുഴുവൻ ശക്തമായ മഴ തുടർന്നിരുന്നു. ഇത് രക്ഷാപ്രവർത്തനത്തെ ബാധിച്ചിരുന്നു. പുലർച്ചെ മൂന്നരയോടെയാണ് എല്ലാവരെയും വനത്തിൽ നിന്ന് പുറത്തെത്തിക്കാൻ സാധിച്ചത്. ആർക്കും തന്നെ ആരോഗ്യപ്രശ്നങ്ങൾ ഉണ്ടായിരുന്നില്ല. ഇതേ തുടർന്ന് എല്ലാവരെയും വീടുകളിലേക്ക് പോകാൻ അനുവദിച്ചു.
Discussion about this post