തിരുവനന്തപുരം:രൂക്ഷമായ സാമ്പത്തിക പ്രതിസന്ധി പരിഹരിക്കാന് മദ്യവില്പനക്കൊരുങ്ങി സപ്ലൈകോ.ഇതിനായി സര്ക്കാരിന്റെ അനുമതി തേടി സപ്ലൈകോ സി.എം.ഡി ശ്രീറാം വെങ്കിട്ടരാമന് ഭക്ഷ്യവകുപ്പിനെ സമീപിച്ചു.സാമ്പത്തികപ്രതിസന്ധികാരണം ക്രിസ്മസ് ചന്തകള് തുടങ്ങുന്നതുപോലും സംശയത്തില് നില്ക്കെയാണ് പുതിയ നീക്കം.
കണ്സ്യൂമര്ഫെഡിന് സമാനമായി മദ്യ വില്പന തുടങ്ങിയാല് സാമ്പത്തിക പ്രതിസന്ധിക്ക് പരിഹാരമാകുമെന്നാണ് മാനേജ്മെന്റിന്റെ വിലയിരുത്തല്.സര്ക്കാരിന്റെ നയപരമായ അനുമതി ലഭിച്ചാലായിരിക്കും ഇതുമായി മുന്നോട്ട്പോകുക.എല്ലാ ജില്ലകളിലും നിരവധി സ്ഥലങ്ങളില് സപ്ലൈകോ പൊതുവിതരണ വില്പനകേന്ദ്രങ്ങളുണ്ട്. ഇവിടങ്ങളില് തെരഞ്ഞെടുത്ത വില്പനശാലകള് വഴി മദ്യവില്പനയ്ക്ക് സംവിധാനമൊരുക്കാനാകുമെന്നാണ് പ്രാഥമിക വിലയിരുത്തല്.
ബിവറേജസില്നിന്ന് വില്പനയ്ക്ക് എടുക്കുന്ന മദ്യത്തിന് 20 ശതമാനം വരെ ലാഭമെടുക്കാനാകും. അടുത്തിടെ ലാഭവിഹിതം മദ്യക്കമ്പനികള് വര്ദ്ധിപ്പിച്ചിരുന്നു. വില്പന നടത്തിയശേഷം മദ്യക്കമ്പനികള്ക്ക് തുക നല്കുന്ന രീതിയാണ് ബിവറേജസ് അവലംബിക്കുന്നത്. അതുകൊണ്ടുതന്നെ സപ്ലൈകോയ്ക്ക് മദ്യവില്പന തുടങ്ങാന് സാമ്പത്തിക പ്രതിസന്ധി തടസമാകില്ലെന്നും വിലയിരുത്തലുണ്ട്.
അതേസമയം സിവില് സപ്ലൈസ് കോര്പറേഷന് സബ്സിഡി ഭക്ഷ്യവസ്തുക്കള് നല്കുന്ന വിതരണക്കാര് ടെന്ഡറുകള് ബഹിഷ്കരിച്ചത് ക്രിസ്മസ്, പുതുവത്സര വിപണിയെ പ്രതിസന്ധിയിലാക്കിയിട്ടുണ്ട്. ആറുമാസത്തെ കുടിശ്ശികയായ 800 കോടി നല്കാത്തതില് പ്രതിഷേധിച്ചാണ് ഇ ടെന്ഡറുകള് ഫുഡ് ഗ്രെയിന്സ് പള്സസ് ആന്ഡ് സ്പൈസസ് സപ്ലൈയേഴ്സ് അസോസിയേഷന് (എഫ്.ജി.പി.എസ്.എസ്.എ) ബഹിഷ്കരിച്ചത്. സാമ്പത്തിക പ്രതിസന്ധിയെ തുടര്ന്ന് സപ്ലൈകോയില് കഴിഞ്ഞ മാസത്തെ ശമ്പളവിതരണം പോലും പൂര്ത്തിയാക്കിട്ടില്ല. പ്രതിവര്ഷം 56 കോടി രൂപയും പ്രതിമാസം 4.6 കോടി രൂപയുമാണ് ശമ്പളത്തിനുവേണ്ടത്.
Discussion about this post