ന്യൂഡല്‍ഹി: മെട്രോയുടെ വാതിലില്‍ സാരി കുടുങ്ങിയുണ്ടായ അപകടത്തില്‍ യുവതിയുടെ ബന്ധുക്കള്‍ക്ക് ഡല്‍ഹി മെട്രോ റെയില്‍ കോര്‍പ്പറേഷന്‍ 15 ലക്ഷം രൂപ നഷ്ടപരിഹാരം നല്‍കാന്‍ തീരുമാനം. കുറച്ചു ദിവസം മുന്‍പ് ട്രെയിനില്‍ കയറുന്നതിനിടെ സാരി വാതിലില്‍ കുടുങ്ങി ട്രാക്കില്‍ വീഴുകയായിരുന്നു യുവതി. ഡല്‍ഹിയിലെ ഇന്ദ്രലോക് മെട്രോ സ്റ്റേഷനിലായിരുന്നു അപകടം.
കോച്ചിനുള്ളിലേക്ക് കടന്ന യുവതി, കുട്ടിയെ കൂട്ടുന്നതിന് വേണ്ടി തിരിഞ്ഞപ്പോഴായിരുന്നു സാരി ഉടക്കി ട്രാക്കില്‍ വീഴുന്നത്. യുവതിയെയും വലിച്ചുകൊണ്ട് ട്രെയിന്‍ അല്‍പ്പദൂരം മുന്നോട്ട് നീങ്ങുകയും ചെയ്തു. ഇതിനിടെ യുവതിയുടെ തലയ്ക്കും നെഞ്ചിനും ഗുരുതരമായി പരിക്കേല്‍ക്കുകയും ചെയ്തു. യുവതിയെ ഉടന്‍ തന്നെ സഫ്ദര്‍ജംഗ് ആശുപത്രിയില്‍ പ്രവേശിപ്പിച്ചുവെങ്കിലും മരണം സംഭവിക്കുകയായിരുന്നു.
2017 ലെ മെട്രോ വ്യവസ്ഥകള്‍ അനുസരിച്ച്, മരിച്ചയാളുടെ അടുത്ത ബന്ധുക്കള്‍ക്ക് അഞ്ച് ലക്ഷം രൂപ നഷ്ടപരിഹാരം നല്‍കും. കൂടാതെ, മരിച്ചവരുടെ മക്കള്‍ക്ക് മാനുഷിക സഹായമെന്ന നിലയില്‍ 10 ലക്ഷം രൂപ കൂടി നല്‍കും. കൂടാതെ, രണ്ട് കുട്ടികളുടെ വിദ്യാഭ്യാസവും ഡിഎംആര്‍സി ഏറ്റെടുക്കും. കുട്ടികളുടെ സംരക്ഷണവും വിദ്യാഭ്യാസവും ഡല്‍ഹി മെട്രോ മാനേജ്മെന്റ് ഉറപ്പാക്കണമെന്ന് ഭവന, നഗരകാര്യ മന്ത്രി ഹര്‍ദീപ് സിംഗ് പുരിയും നിര്‍ദ്ദേശം നല്‍കിയിരുന്നു.
Discussion about this post