കൊച്ചി: തദ്ദേശ സ്വയംഭരണ സ്ഥാപനങ്ങൾ വഴിയുള്ള സേവനങ്ങൾ ജനുവരി ഒന്നുമുതൽ സ്മാർട്ട് ആക്കാൻ ഒരുങ്ങി കേരള സർക്കാർ. കെ -സ്മാർട്ട് അഥവാ കേരള സൊല്യൂഷൻസ് ഫോർ മാനേജിംഗ് അഡ്മിനിസ്ട്രേറ്റീവ് റീഫർമേഷൻ ആൻഡ് ട്രാൻസ്ഫർമേഷൻ മുഖേന തദ്ദേശ സ്ഥാപനങ്ങളിൽ നിന്നുളള സേവനങ്ങൾ പൊതുജനങ്ങളിലെത്തിക്കാനാണ് ലക്ഷ്യമിടുന്നത്. ആദ്യഘട്ടത്തിൽ കോർപ്പറേഷനുകളിലും നഗരസഭകളിലും മാത്രമാണ് കെ സ്മാർട്ട് ലഭിക്കുക.
കേരളത്തിലെ എല്ലാ മുൻസിപ്പൽ കോർപ്പറേഷനുകളിലും മുനിസിപ്പാലിറ്റികളിലും കെസ്മാർട്ട് സോഫ്റ്റ്വെയർ ആപ്ലിക്കേഷൻ വിന്യസിക്കും. ഇതിന്റെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയൻ ജനുവരി ഒന്നിന് രാവിലെ 10.30ന് കൊച്ചി കലൂർ ഗോകുലം കൺവെൻഷൻ സെന്ററിൽ നിർവഹിക്കുമെന്ന് സർക്കാർ അറിയിച്ചു. തദ്ദേശ സ്വയംഭരണ വകുപ്പ് മന്ത്രി എം.ബി രാജേഷ് ചടങ്ങിൽ അധ്യക്ഷത വഹിക്കും.
കെസ്മാർട്ട് മൊബൈൽ ആപ്പിന്റെ ഉദ്ഘാടനം നിയമ, വ്യവസായ, കയർ വികസന വകുപ്പ് മന്ത്രി പി. രാജീവ് നിർവഹിക്കും. മുനിസിപ്പാലിറ്റികളും കോർപ്പറേഷനുകളുമടക്കം എല്ലാ തദ്ദേശ സ്വയംഭരണ സ്ഥാപനങ്ങളിൽ നിന്നുമുള്ള സേവനങ്ങൾ ഓഫീസുകളിൽ പോകാതെ പൊതുജനങ്ങൾക്ക് പ്രയോജനപ്പെടുത്താൻ കെ സ്മാർട്ടിലൂടെ സാധിക്കുമെന്നാണ് സർക്കാരിന്റെ അവകാശവാദം. തദ്ദേശ സ്വയംഭരണ വകുപ്പിനുവേണ്ടി ഇൻഫർമേഷൻ കേരള മിഷനാണ് കെ-സ്മാർട്ട് ആപ്ലിക്കേഷൻ വികസിപ്പിച്ചിരിക്കുന്നത്.
തദ്ദേശ സ്ഥാപനങ്ങളുടെ പ്രവർത്തനങ്ങളും അവയുടെ സേവനങ്ങളുമെല്ലാം ഒറ്റ പ്ലാറ്റ്ഫോമിലൂടെ ജനങ്ങൾക്ക് ഓൺലൈനായി കെ -സ്മാർട്ടിലൂടെ ലഭ്യമാകും. ആദ്യ ഘട്ടത്തിൽ, സംസ്ഥാനത്തെ നഗര സഭകളിലും കോർപ്പറേഷനുകളിലുമാകും കെ – സ്മാർട്ട് സേവനം ലഭ്യമാകുന്നത്. പിന്നീട് ഗ്രാമ പഞ്ചായത്തുകളിലേക്കും സേവനമെത്തും.
ലോഗോ പ്രകാശനം ഹൈബി ഈഡൻ എം.പിയും എറണാകുളം ജില്ലയിൽ സ്ഥാപിച്ച ഐ.കെ.എം പ്രോഡക്ട് ഇന്നവേഷൻ സെന്ററിന്റെ ഉദ്ഘാടനം ടി.ജെ വിനോദ് എംഎൽഎയും നിർവഹിക്കും. തദ്ദേശ സ്വയംഭരണ സ്ഥാപനങ്ങളുടെ പുതുക്കിയ വെബ്സൈറ്റുകളുടെ ഉദ്ഘാടനം കെ.ജെ മാക്സി എം.എൽ.എ നിർവഹിക്കും.
ഐ.കെ.എമ്മും കർണാടക മുനിസിപ്പൽ ഡേറ്റ സൊസൈറ്റിയും തമ്മിലുള്ള ധാരണാപത്രം ഇൻഫർമേഷൻ കേരള മിഷൻ ചീഫ് മിഷൻ ഡയറക്ടറും എക്സിക്യൂട്ടീവ് ഡയറക്ടറുമായ ഡോ. സന്തോഷ് ബാബു ഐ.എ.എസ് (റിട്ട.), കർണാടക മുനിസിപ്പൽ ഡേറ്റ സൊസൈറ്റി ജോയിന്റ് ഡയറക്ടർ (റിഫോംസ്) പ്രീതി ഗെലോട്ട് ഐ.എ.എസ് എന്നിവർ ചേർന്ന് കൈമാറും. കൊച്ചി നഗരസഭ മേയർ അഡ്വ. എം. അനിൽ കുമാർ സ്വാഗതവും ഐ.കെ.എം കൺട്രോളർ ഓഫ് അഡ്മിനിസ്ട്രേഷൻ ടിമ്പിൾ മാഗി പി.എസ് കൃതജ്ഞതയും പറയും.
Discussion about this post