മാലെ: പ്രധാനമന്ത്രി നരേന്ദ്രമോദിയെ അപകീർത്തിപ്പെടുത്തുന്ന പരാമർശങ്ങൾ നടത്തിയ മൂന്ന് മന്ത്രിമാരെയും മന്ത്രിസഭയിൽ നിന്ന് പുറത്താക്കണമെന്ന് മാലിദ്വീപ് എംപി മീകൈൽ അഹമ്മദ് നസീം. പ്രധാനമന്ത്രി മോദിക്കെതിരെ നടത്തിയ അപകീർത്തികരമായ പരാമർശങ്ങളിൽ മുഹമ്മദ് മുയിസു സർക്കാർ ഔപചാരിക മാപ്പ് പറയണമെന്നും നസീം ആവശ്യപ്പെട്ടു.
ചൈനയുമായി ബന്ധപ്പെട്ട് ശ്രീലങ്കയിൽ എന്താണ് സംഭവിച്ചതെന്ന് അദ്ദേഹം ഇപ്പോൾ ഓർമ്മിപ്പിച്ചു. ”നമ്മുടെ അയൽക്കാരിൽ നിന്ന് പാഠങ്ങൾ പഠിക്കുന്നത് നല്ലതാണെന്ന് ഞാൻ കരുതുന്നു, പ്രത്യേകിച്ച് ശ്രീലങ്കയിൽ ഹമ്പൻടോട്ടയിൽ സംഭവിച്ചതെന്ന് അദ്ദേഹം ചൂണ്ടിക്കാട്ടി. മാലിദ്വീപുകാർ നിലവിലെ സർക്കാരിൽ വളരെ നിരാശരാണ്, അവരുടെ പരാമർശങ്ങൾ മാലിദ്വീപുകാരുടെ ഭൂരിപക്ഷ കാഴ്ചപ്പാടുകളെ പ്രതിഫലിപ്പിക്കുന്നില്ലെന്ന് അദ്ദേഹം കൂട്ടിച്ചേർത്തു.
അതേസമയം മാലിദ്വീപിലേക്ക് കൂടുതൽ വിനോദസഞ്ചാരികളെ അയക്കാനുള്ള ശ്രമങ്ങൾ ശക്തമാക്കണമെന്ന് ചൈനയോട് അഭ്യർത്ഥിച്ച് മാലിദ്വീപ് പ്രസിഡന്റ് മുഹമ്മദ് മുയിസു രംഗത്തെത്തി. ഇന്ത്യൻ വിനോദസഞ്ചാരികളുടെ എണ്ണം കുത്തനെ കുറഞ്ഞ പശ്ചാത്തലത്തിൽ കടുത്ത പ്രതിസന്ധി നേരിടുന്നതിനിടെയാണ് മാലി പ്രസിഡന്റിന്റെ ഈ അഭ്യർത്ഥന.
കൂടാതെ, ഇന്ത്യൻ മഹാസമുദ്ര ദ്വീപിൽ സംയോജിത ടൂറിസം സോൺ വികസിപ്പിക്കുന്നതിനുള്ള 50 ദശലക്ഷം യുഎസ് ഡോളറിന്റെ പദ്ധതിയിൽ ഇരു രാജ്യങ്ങളും ഒപ്പുവച്ചതായി മാലിദ്വീപ് മാദ്ധ്യമങ്ങൾ റിപ്പോർട്ട് ചെയ്തു.അടുത്തിടെ ലക്ഷദ്വീപ് സന്ദർശന വേളയിൽ പ്രധാനമന്ത്രി മോദിയുടെ മനോഹരമായ ബീച്ചിൽ അദ്ദേഹത്തിന്റെ വീഡിയോ പോസ്റ്റ് ചെയ്തതിന് ശേഷം മാലദ്വീപ് മന്ത്രിമാർക്കെതിരെ നടത്തിയ അപകീർത്തികരമായ പരാമർശങ്ങളെ തുടർന്നുള്ള നയതന്ത്ര തർക്കങ്ങൾക്കിടയിലാണ് കൂടുതൽ ചൈനീസ് വിനോദസഞ്ചാരികൾക്കായി മുയിസുവിന്റെ അഭ്യർത്ഥന.
സംഭവം വിവാദമായതോടെ സോഷ്യൽ മീഡിയയിൽ അപകീർത്തികരമായ പോസ്റ്റുകൾ ഇട്ടതിന് മൂന്ന് ഉപമന്ത്രിമാരെ മുയിസു സർക്കാർ സസ്പെൻഡ് ചെയ്തിരുന്നു.മാലിദ്വീപ് അസോസിയേഷൻ ഓഫ് ടൂറിസം ഇൻഡസ്ട്രി (MATI) അപകീർത്തികരമായ പരാമർശങ്ങളെ ശക്തമായി അപലപിച്ചു.
അതേസമയം മാലിദ്വീപ് ടൂറിസം മന്ത്രാലയം നേരത്തെ പുറത്തുവിട്ട കണക്കുകൾ പ്രകാരം, 2023-ൽ മാലിദ്വീപിലേക്ക് ഏറ്റവും കൂടുതൽ സന്ദർശകർ എത്തിയത് ഇന്ത്യയിൽ നിന്നാണ്, 209,198 പേർ ആണ് ഇന്ത്യയിൽ നിന്നെത്തിയത്. 209,146 പേർ എത്തിയ റഷ്യ രണ്ടാം സ്ഥാനത്താണ്. 187,118 പേർ എത്തിയ ചൈന മൂന്നാം സ്ഥാനത്താണ്.
