അമരാവതി: ആന്ധ്രപ്രദേശിലെ ലേപാക്ഷിയിലുള്ള വീരഭദ്ര ക്ഷേത്രത്തിൽ ദർശനം നടത്തി പ്രധാനമന്ത്രി നരേന്ദ്ര മോദി. ക്ഷേത്രത്തിൽ പൂജ നടത്തുന്ന പ്രധാനമന്ത്രിയുടെ വീഡിയോ സമൂഹമാദ്ധ്യമങ്ങളിൽ പങ്കുവച്ചിട്ടുണ്ട്. പരമ്പരാഗത വേഷത്തിലാണ് അദ്ദേഹം ക്ഷേത്രത്തിലെത്തിയത്. പ്രധാന പ്രതിഷ്ഠയായ വീരഭദ്രന്റെ മുന്നിൽ നിന്ന് അദ്ദേഹം ആരതി ഉഴിയുന്നതും വീഡിയോയിൽ കാണാം.
രംഗനാഥ രാമായൺ ചൊല്ലിയ കീർത്തനവും കേട്ടതിന് ശേഷമാണ് അദ്ദേഹം ക്ഷേത്ര ദർശനം പൂർത്തിയാക്കിയത്. ക്ഷേത്രത്തിനുള്ളിൽ നിലത്തിരുന്ന് ശ്രീരാം ജയ് രാം എന്ന ഭജന പാടുന്ന പ്രധാനമന്ത്രിയുടെ മറ്റൊരു വീഡിയോയും പുറത്തുവന്നിട്ടുണ്ട്.
രാമായാണവുമായി ബന്ധപ്പെട്ട ക്ഷേത്രമാണ് ആന്ധ്രാപ്രദേശിലെ വീരഭദ്ര ക്ഷേത്രം. പരമശിവന്റെ മറ്റൊരു അവതാരമാണ് വീരഭദ്രൻ. സീതയെ രക്ഷിക്കുന്നതിനിടെ രാവണനാൽ ആക്രമിക്കപ്പെട്ട ജഡായു ലേപാക്ഷിയിലാണ് വീണതെന്നാണ് വിശ്വാസം. സ്ഥലത്ത് എത്തിയ രാമനോട് ജഡായു നടന്ന കാര്യങ്ങൾ പറഞ്ഞു. ജഡായുവിന്റെ അവസ്ഥ മനസിലാക്കിയ രാമൻ പക്ഷിരാജനോട് ‘ലെ പക്ഷി’ അതായത് എഴുന്നേൽക്കൂ പക്ഷീ എന്ന് പറഞ്ഞെന്നും പിന്നീട് ജഡായുവിന് അവിടെ വച്ച് മോക്ഷം ലഭിച്ചുവെന്നും കരുതുന്നു.
Discussion about this post