തേഞ്ഞിപ്പാലം; കാലിക്കറ്റ് സർവകലാശാല സിൻഡിക്കേറ്റ് തിരഞ്ഞെടുപ്പ് ചാൻസലർ കൂടിയായ ഗവർണർ ആരിഫ് മുഹമ്മദ് ഖാൻസ്റ്റേ ചെയ്തു. സർവകലാശാല അദ്ധ്യാപകരായ ഡോ. പി.രവീന്ദ്രൻ, ഡോ.വാസുദേവൻ ടി.എം. എന്നിവരുടെ നോമിനേഷൻ തള്ളിയ റിട്ടേർണിങ് ഓഫീസറായ സർവകലാശാല രജിസ്ട്രാറുടെ നടപടിക്കെതിരെ ഈ അദ്ധ്യാപകരും സെനറ്റ് അംഗം ഡോ. വി.എം ചാക്കോയും നൽകിയ പരാതിയെ തുടർന്നാണ് നടപടി.
തെരഞ്ഞെടുപ്പ് നടപടിക്രമങ്ങൾ പുരോഗമിക്കുന്നതിനിടെയാണ് ഗവർണറുടെ ഇടപെടൽ.വിഷയത്തിൽ രേഖകൾ ഹാജരാക്കാൻ ഗവർണർ വൈസ് ചാൻസലറോട് ആവശ്യപ്പെട്ടു.
അതേസമയം, വൈസ് ചാൻസലർ നിയമനത്തിനായുള്ള സേർച്ച് കമ്മിറ്റിയിലേക്ക് പ്രതിനിധിയെ നൽകണമെന്ന് വി.സിമാരോട് ഗവർണർ ആവശ്യപ്പെട്ടു. ഒരുമാസത്തിനകം അറിയക്കണമെന്നും അല്ലാത്തപക്ഷം സ്വന്തം നിലക്ക് കമ്മിറ്റി രൂപീകരിച്ച് നിയമനം നടത്തുമെന്നും ഗവർണർ മുന്നറിയിപ്പ് നൽകി.
