ന്യൂഡൽഹി : റാഞ്ചിയിൽ ഇംഗ്ലണ്ടിനെതിരായ നാലാം ടെസ്റ്റിൽ ചരിത്ര നേട്ടം കുറിച്ച് ഇന്ത്യയുടെ ഇതിഹാസ സ്പിന്നർ രവിചന്ദ്രൻ അശ്വിൻ. ഇന്ത്യൻ മണ്ണിൽ നടന്ന മത്സരങ്ങളിൽ ഏറ്റവും കൂടുതൽ ടെസ്റ്റ് വിക്കറ്റുകൾ നേടുന്ന ബൗളർ ആയി രവിചന്ദ്രൻ അശ്വിൻ മാറി. അനിൽ കുംബ്ലെയുടെ റെക്കോർഡ് ആണ് അശ്വിൻ തകർത്തത്.
തന്റെ കരിയറിൽ 132 ടെസ്റ്റുകളിൽ നിന്നായി 619 വിക്കറ്റുകളാണ് അനിൽ കുംബ്ലെ നേടിയിട്ടുള്ളത്. ഇന്ത്യയിൽ നടന്ന ടെസ്റ്റ് മത്സരങ്ങളിൽ അദ്ദേഹം 63 മത്സരങ്ങളിൽ നിന്നായി 350 വിക്കറ്റുകൾ ആണ് നേടിയിട്ടുള്ളത്. ഇന്ന് റാഞ്ചിയിൽ നടന്ന തന്റെ 59ആം മത്സരത്തിലൂടെ രവിചന്ദ്രൻ അശ്വിൻ ഇന്ത്യൻ മണ്ണിൽ നിന്നും നേടിയ വിക്കറ്റുകളുടെ എണ്ണം 354 ആയി.
ഇംഗ്ലണ്ടിനെതിരായ രണ്ടാം ഇന്നിംഗ്സിൽ അഞ്ച് വിക്കറ്റ് വീഴ്ത്തിയാണ് അശ്വിൻ കുംബ്ലെയ്ക്കൊപ്പമെത്തിയത്. കരിയറിലെ മുഴുവൻ ടെസ്റ്റ് മത്സരങ്ങളിൽ നിന്നുമായി 507 വിക്കറ്റുകളാണ് ഇപ്പോൾ രവിചന്ദ്രൻ അശ്വിൻ സ്വന്തമാക്കിയിരിക്കുന്നത്. ഒരു ഇന്നിംഗ്സിൽ ഏറ്റവും വേഗത്തിൽ അഞ്ചോ അതിലധികമോ വിക്കറ്റുകൾ വീഴ്ത്തുന്ന ഇന്ത്യൻ ബൗളർ എന്ന നിലയിലും രവിചന്ദ്രൻ അശ്വിൻ ഇപ്പോൾ അനിൽ കുംബ്ലെയ്ക്കൊപ്പം എത്തിയിട്ടുണ്ട്.
Discussion about this post