തിരുവനന്തപുരം; കേന്ദ്രസർക്കാർ ഇന്നലെ വിജ്ഞാപനമിറക്കിയ പൗരത്വ ഭേദഗതി നിയമത്തിനെതിരെ സുപ്രീംകോടതിയെ സമീപിച്ച് മുസ്ലീം ലീഗും ഡിവൈഎഫ്ഐയും. വിജ്ഞാപനം സ്റ്റേ ചെയ്യണം എന്നാവശ്യപ്പെട്ടാണ് ഇരു സംഘടനകളും സുപ്രീം കോടതിയെ സമീപിച്ചിരിക്കുന്നത്. മുതിർന്ന അഭിഭാഷകൻ ഹാരിസ് ബീരാനാണ് മുസ്ലീം ലീഗിനായി ഹർജി സമർപ്പിച്ചിരിക്കുന്നത്. ഹർജി ഉടൻ പരിഗണിക്കണം എന്നാവശ്യപ്പെട്ട മുസ്ലീം ലീഗ് രജിസ്ട്രാർക്ക് കത്ത് നൽകുകയും ചെയ്തു. പൗരത്വ അപേക്ഷക്ക് മറ്റ് സമുദായങ്ങൾക്ക് ഓൺലൈനായി അപേക്ഷിക്കാനുള്ള സൗകര്യമുണ്ടെങ്കിൽ മുസ്ലീങ്ങൾക്കും അതിന് സൗകര്യം നൽകണം എന്നും ഹർജിയിൽ ആവശ്യപ്പെട്ടിട്ടുണ്ട്.
പൗരത്വ നിയമ ഭേദഗതി ഭരണഘടനയോടുള്ള വെല്ലുവിളിയാണെന്ന് ഡി വൈ എഫ് ഐ പ്രതികരിച്ചു. ഡി ഐ എഫ് ഐയും സുപ്രീം കോടതിയെ സമീപിക്കും. അതേസമയം പൗരത്വ ഭേദഗതിയിൽ സംസ്ഥാന സർക്കാരും സുപ്രീംകോടതിയെ സമീപിക്കാൻ ഒരുങ്ങുകയാണ്. ഇതുമായി ബന്ധപ്പെട്ട നിയമപരിശോധന ആരംഭിച്ചിരിക്കുകയാണ് ഇടതുസർക്കാർ.
Discussion about this post