തിരുവനന്തപുരം: മലയാളത്തിലെ ഹിറ്റ് ചിത്രം മഞ്ഞുമ്മൽ ബോയ്സിനെ അധിക്ഷേപിച്ച എഴുത്തുകാരൻ ജയമോഹനെ വിമർശിച്ച് നിർമ്മാതാവും ബിജെപി സംസ്ഥാന സമിതി അംഗവുമായ സുരേഷ് കുമാർ. സിനിമയ്ക്കും മലയാളികൾക്കെതിരെയും ജയമോഹൻ നടത്തിയ പരാമർശം തെമ്മാടിത്തരം ആണെന്ന് അദ്ദേഹം പറഞ്ഞു. മദ്യപാനത്തെയും വ്യഭിചാരത്തെയും സാമാന്യവത്കരിക്കുന്ന ചിത്രമാണ് മഞ്ഞുമ്മൽ ബോയ്സ് എന്നായിരുന്നു ജയമോഹന്റെ പരാമർശം.
നമ്മുടെ ചെറുപ്പക്കാർ ഉണ്ടാക്കുന്ന സിനിമ കണ്ട് ഇന്ന് ലോകം പോലും അമ്പരക്കുന്ന സ്ഥിതിവിശേഷം ആണ് ഉള്ളതെന്ന് സുരേഷ് കുമാർ പറഞ്ഞു. ഇതിനിടെയാണ് മലയാളി ചിത്രത്തെ ജയമോഹൻ അധിക്ഷേപിച്ചിരിക്കുന്നത്. മഞ്ഞുമ്മൽ ബോയ്സിനെക്കുറിച്ചും മലയാളികളെക്കുറിച്ചും ജയമോഹൻ പറഞ്ഞത് തെമ്മാടിത്തരമാണ്. തമിഴ് സിനിമയെക്കുറിച്ച് ഇങ്ങനെ പറയാൻ ജയമോഹൻ ധൈര്യം കാണിക്കുമോയെന്നും സുരേഷ് കുമാർ ചോദിച്ചു.
തമിഴ് സിനിമയിൽ ആകെ മദ്യപാനികളാണെന്ന് പറഞ്ഞാൽ ജയമോഹനെ തൂക്കിയെടുത്ത് കളിയക്കാവിളയിൽ കൊണ്ടിടും. മലയാളത്തിൽ ഒന്നോ രണ്ടോ സിനിമ മാത്രമാണ് ജയമോഹൻ ചെയ്തിട്ടുള്ളത്. അങ്ങനെയൊരാൾക്ക് മലയാള സിനിമയെ വിമർശിക്കാനുള്ള അർഹതയില്ല. നമ്മുടെ സിനിമകളെ ചെറുത്താക്കി കാണാനാണ് ജയമോഹന്റെ ശ്രമം. തമിഴ്നാട്ടിൽ ആരും മദ്യപിക്കാറില്ലേയെന്നും അദ്ദേഹം ചോദിച്ചു.
Discussion about this post