2023 ഒക്ടോബറിൽ ഒരു ശ്രീരാമ ഭജൻ പാടി റെക്കോർഡ് ചെയ്ത് തന്റെ യൂട്യൂബ് ചാനലിൽ അപ്ലോഡ് ചെയ്യുമ്പോൾ രാജ്യം മുഴുവൻ ആ ഗാനം ഒരു തരംഗമായി മാറുമെന്ന് സ്വാതി മിശ്ര എന്ന ഗായിക ഒരിക്കലും വിചാരിച്ചിരുന്നില്ല. അപ്ലോഡ് ചെയ്ത് ഏതാനും ആഴ്ചകൾ കൊണ്ട് തന്നെ ഗാനം ശ്രദ്ധ നേടുകയും നിരവധി മികച്ച അഭിപ്രായങ്ങൾ ഏറ്റുവാങ്ങുകയും ചെയ്തുവെങ്കിലും സ്വാതി മിശ്ര എന്ന ഗായികയുടെ തലവര തന്നെ മാറിയത് പ്രധാനമന്ത്രി നരേന്ദ്രമോദിയുടെ ഒരൊറ്റ പോസ്റ്റിലൂടെ ആയിരുന്നു.
രാമക്ഷേത്രം ഉദ്ഘാടനം ചെയ്യപ്പെടുന്നതിന്റെ ഏതാനും ദിവസങ്ങൾക്കു മുൻപാണ് പ്രധാനമന്ത്രി നരേന്ദ്രമോദി അതിമനോഹരമായ ഈ ശ്രീരാമ ഭജനെ അഭിനന്ദിച്ചുകൊണ്ട് തന്റെ ഔദ്യോഗിക എക്സ് അക്കൗണ്ടിൽ ഒരു പോസ്റ്റ് കുറിക്കുന്നത്. ഭോജ്പുരി ഗായികയായ സ്വാതി മിശ്രയുടെ ‘രാം ആയേംഗേ’ എന്ന മനോഹരമായ ശ്രീരാമ ഭക്തിഗാനം ആയിരുന്നു അത്. പ്രധാനമന്ത്രിയുടെ പോസ്റ്റോടുകൂടി രാജ്യം മുഴുവൻ സ്വാതി മിശ്രയുടെ ഗാനം ശ്രദ്ധ നേടി.
ഇപ്പോഴിതാ ഏതാനും ആഴ്ചകൾ കൊണ്ട് യൂട്യൂബിൽ 100 മില്യണിൽ അധികം കാഴ്ചക്കാരാണ് ഈ മനോഹരമായ ശ്രീരാമ ഭജൻ കണ്ടിരിക്കുന്നത്. ഇതുവരെയായി 117 മില്യൺ ആളുകൾ സ്വാതി മിശ്ര ആലപിച്ച ഈ ഭജൻ കേട്ട് കഴിഞ്ഞു. ശ്രീ പ്രേംഭൂഷൻ ജി മഹാരാജ് സംഗീതം നിർവഹിച്ച് അന്തരിച്ച ശ്യാം സുന്ദർ ശർമ രചിച്ച ‘രാം ആയേംഗേ’ എന്നാ ശ്രീരാമ ഭക്തിഗാനത്തിന്റെ റീമിക്സിങ് ആണ് സ്വാതി മിശ്ര ആലപിച്ചിട്ടുള്ളത്. മോഹിത് മുസിക് ആണ് ഈ ഗാനത്തിന്റെ പുതിയ പതിപ്പിന് സംഗീതം നൽകിയിരിക്കുന്നത്. ഒരിക്കൽ കേട്ടാൽ വീണ്ടും വീണ്ടും കേൾക്കാൻ തോന്നുന്ന അത്രയേറെ ആഴത്തിൽ സ്പർശിക്കുന്ന എന്തോ ഒരു മാന്ത്രികത ഈ ഗാനത്തിനും സ്വാതി മിശ്രയുടെ ശബ്ദത്തിനും ഉണ്ടെന്നാണ് വീഡിയോയ്ക്ക് താഴെ ആരാധകർ അഭിപ്രായം രേഖപ്പെടുത്തുന്നത്.
Discussion about this post