ഇസ്തിരി പെട്ടി ഇല്ലാതിരുന്ന കാലത്തുള്ളവർ പല തരത്തിലും ഇസ്തിരി ഇടുന്നതിനെ കുറിച്ച് നാം പറഞ്ഞു കേട്ടിട്ടുണ്ട്. ചിരട്ട കത്തിച്ച് കനലാക്കിയാണ് പലരും അക്കാലത്ത് ഇസ്തിരിയിടാറ്. ഇപ്പോൾ പല ആധുനികമായ മാർഗങ്ങളും വന്നതോടെ ആരും ഇതിന് മെനക്കെടാറില്ല. കറണ്ട് ഇല്ലാതാകുന്ന സമയമാണ് നാമെല്ലാം പെട്ടു പോകുന്നത്. എന്നാൽ, കറണ്ട് ഇല്ലാതെ തന്നെ ഇസ്തിരി ഇടാൻ പറ്റുന്ന ഒരു മാർഗമാണ് ഇപ്പോൾ സോഷ്യൽ മിഡിയയിൽ പ്രചരിക്കുന്നത്.
പ്രഷർ കുക്കർ ഉപയോഗിച്ച് ഷർട്ട് ഇസ്തിരിയിടുന്ന യുവതിയുടെ വീഡിയോ സമൂഹമാദ്ധ്യമങ്ങളിൽ വൈറലാകുകയാണ്. ഇൻഡക്ഷൻ കുക്കറിൽ പ്രഷർ കുക്കർ വച്ച് ചൂടാക്കിയതിന് ശേഷം അതെടുത്താണ് അവർ ഷർട്ട് തേയ്ക്കുന്നത്. എന്തായാലും ദോഷം പറയാൻ കഴിയില്ല. ഷർട്ടിന്റെ ചുളിവെല്ലാം പോകുന്നത് വീഡിയോയിൽ കാണാം.
വീഡിയോ വൈറലായതോടെ നിരവധി പേരാണ് കമന്റുകളുമായി രംഗത്തെത്തിയിരിക്കുന്നത്. നല്ല ഐഡിയ എന്നും ഇനി ഇസ്തിരി പെട്ടി വാങ്ങി പണം കളയേണ്ടല്ലോ എന്നും പലരും ചോദിച്ചിരിക്കുന്നു. ഏതൊരു അവസ്ഥയിലും പ്രശ്നങ്ങളെ മറി കടക്കാനുള്ള വഴികൾ ഇന്ത്യക്കാർ കണ്ടുപിടിക്കുമെന്നും കമന്റുകളുണ്ട്. എന്നാൽ, വീഡിയോയ്ക്ക് വിമർശനവുമായും പലരും എത്തിയിട്ടുണ്ട്. കുക്കർ അപകടം പിടിച്ചതാണ്. ഇത്തരം കാര്യങ്ങൾ ചെയ്യുമ്പോൾ മുന്നും പിന്നും നോക്കുന്നത് നല്ലതായിരിക്കുമെന്ന് ചിലർ ഓർമപ്പെടുത്തുന്നു.
