കൊൽക്കത്ത : പശ്ചിമ ബംഗാൾ മുഖ്യമന്ത്രി മമത ബാനർജിക്ക് പരിക്ക്. തലയ്ക്ക് പരിക്കേറ്റ മമതയെ ആശുപത്രിയിൽ പ്രവേശിപ്പിച്ചതായി തൃണമൂൽ കോൺഗ്രസ് അറിയിച്ചു. ഇതോടൊപ്പം പരിക്കേറ്റ് ആശുപത്രിയിൽ കിടക്കുന്ന മമത ബാനർജിയുടെ ചിത്രങ്ങളും പാർട്ടി എക്‌സ് പ്ലാറ്റ്‌ഫോമിലൂടെ പങ്കുവെച്ചിട്ടുണ്ട്.
നെറ്റി പൊട്ടി ചോരയൊലിക്കുന്ന മമതയുടെ ചിത്രങ്ങളാണ് പുറത്തുവന്നിരിക്കുന്നത്. അപകടത്തിൽ പരിക്കേറ്റതാണെന്നാണ് പ്രാഥമിക നിഗമനം. മമത ബാനർജിയുടെ ഔദ്യോഗിക വസതിയിൽ വെച്ചാണ് പരിക്കേറ്റത് എന്നാണ് വിവരം. എന്നാൽ ഇതുമായി ബന്ധപ്പെട്ട കൂടുതൽ വിവരങ്ങൾ പുറത്തുവന്നിട്ടില്ല. പരിക്ക് ഗുരുതരമാണെന്ന് തൃണമൂൽ നേതാക്കൾ വ്യക്തമാക്കുന്നുണ്ട്.
പരിക്കേറ്റ മമതയെ കൊൽക്കത്തയിലെ എസ് എസ് കെ എം ആശുപത്രിയിൽ പ്രവേശിപ്പിച്ചിരിക്കുകയാണ്. നെറ്റിയിലുണ്ടായ മുറിവ് ആഴത്തിലുള്ളതെന്നാണെന്ന് ആശുപത്രി അധികൃതർ അറിയിക്കുന്നുണ്ട്.
