കേരളക്കരയിലെ തീയറ്ററുകളിൽ മറ്റൊരു ഉത്സവകാലം കൊണ്ടാടാൻ ഷാജി പാപ്പനും പിള്ളേരും വീണ്ടും വരുന്നു. മിഥുൻ മാനുവൽ തോമസ് ഒരുക്കുന്ന ആട് സിനിമയുടെ മൂന്നാം ഭാഗം പ്രഖ്യാപിച്ചു. ചിത്രത്തിലെ കേന്ദ്ര കഥാപാത്രമായ ഷാജി പാപ്പനായി അഭിനയിക്കുന്ന നടൻ ജയസൂര്യയാണ് തന്റെ സമൂഹമാദ്ധ്യമ അക്കൗണ്ടിലൂടെ ആട് 3 പോസ്റ്റർ പങ്കുവെച്ചത്. വിജയ് ബാബു ആണ് ചിത്രം നിർമ്മിക്കുന്നത്.
ഫ്രൈഡേ ഫിലിംസ് നിർമ്മിച്ച് മിഥുൻ മാനുവൽ തോമസ് സംവിധാനം ചെയ്ത ‘ആട് ഒരു ഭീകര ജീവിയാണ്’ ആയിരുന്നു ആട് സീരിസിലെ ഒന്നാം ഭാഗം. എന്നാൽ ആദ്യ ഭാഗത്തിന് തീയേറ്ററുകളിൽ അത്ര വലിയ പ്രതികരണം ആയിരുന്നില്ല ലഭിച്ചിരുന്നത്. എന്നാൽ പിന്നീട് ചിത്രം സമൂഹമാദ്ധ്യമങ്ങളിലൂടെ വളരെയധികം ശ്രദ്ധിക്കപ്പെട്ടു. സമൂഹമാധ്യമങ്ങളിൽ നിന്നും ലഭിച്ച വലിയ സ്വീകാര്യതയെ തുടർന്നാണ് നിർമ്മാതാവ് വിജയ് ബാബു ആട് രണ്ടാം ഭാഗം നിർമ്മിക്കുന്നത്. തിയേറ്ററുകളെ ഇളക്കിമറിച്ച ആട് രണ്ടിന് മികച്ച സ്വീകാര്യതയാണ് കേരളത്തിൽ നിന്നും ലഭിച്ചത്.
ആട് രണ്ടാം ഭാഗത്തിന്റെ വിജയത്തെ തുടർന്ന് ചിത്രത്തിന് മൂന്നാം ഭാഗവും ഉണ്ടാകുമെന്ന് നിർമ്മാതാവും സംവിധായകനും വ്യക്തമാക്കിയിരുന്നു. ഇപ്പോഴത് ആട് മൂന്ന് ഉടൻ തന്നെ ഉണ്ടാകും എന്ന് പ്രഖ്യാപിച്ചിരിക്കുകയാണ്. നടൻ ജയസൂര്യ, നിർമാതാവ് വിജയ് ബാബു, സംവിധായകൻ മിഥുൻ മാനുവൽ തോമസ് തുടങ്ങിയവർ സമൂഹമാദ്ധ്യമങ്ങളിലൂടെ ആട് മൂന്നാം ഭാഗത്തിന്റെ സർപ്രൈസ് പോസ്റ്റർ പങ്കുവെച്ചിട്ടുണ്ട്. മൂവരും ഓരോ ആടിനെ തോളിലും കൈകളിലുമെടുത്ത് നിൽക്കുന്ന പോസ്റ്ററാണ് പങ്കുവെച്ചിട്ടുള്ളത്.
Discussion about this post