ന്യൂഡൽഹി: കുട്ടികളോട് എല്ലായ്പ്പോഴും പ്രത്യേക സ്നേഹം കാത്ത് സൂക്ഷിക്കുകയും അവരോട് തന്റെ വാത്സല്യം പ്രകടിപ്പിക്കുകയും ചെയ്യുന്ന വ്യക്തിയാണ് പ്രധാനമന്ത്രി നരേന്ദ്ര മോദി. വിദേശ സന്ദർശനങ്ങളിൽ ഉൾപ്പെടെ അദ്ദേഹം കുട്ടികളെ കാണുകയും അവർക്കൊപ്പം സമയം ചെലവഴിക്കുകയും ചെയ്യാറുണ്ട്. ഇത് എല്ലായ്പ്പോഴും വലിയ വാർത്തയാകാറുമുണ്ട്. ഇപ്പോഴിതാ ഭൂട്ടാൻ രാജാവിന്റെ മക്കൾക്കൊപ്പം കളിച്ചുല്ലസിക്കുന്ന പ്രധാനമന്ത്രിയുടെ ചിത്രമാണ് പുറത്തുവന്നിരിക്കുന്നത്.
കഴിഞ്ഞ ആഴ്ച ദ്വിദിന സന്ദർശനത്തിനായി പ്രധാനമന്ത്രി ഭൂട്ടാനിൽ എത്തിയിരുന്നു. അപ്പോഴായിരുന്നു ഭൂട്ടാൻ രാജാവ് ജിഗ്മേ ഖേസർ നാംഗ്യേൽ വാംഗ്ചുക്കും കുടുംബവുമായുള്ള കൂടിക്കാഴ്ച. പ്രധാനമന്ത്രിയ്ക്കായി രാജാവ് വസതിയിൽ പ്രത്യേക വിരുന്നൊരുക്കിയിരുന്നു. ഇതിൽ പങ്കെടുക്കാനെത്തിയപ്പോഴായിരുന്നു വാംഗ്ചുക്കിന്റെ കുട്ടികൾക്കൊപ്പം പ്രധാനമന്ത്രി കളിച്ച് രസിച്ചത്.
രാജ്ഞി ജെസ്റ്റുൻ പേമ മക്കളായ ജിംഗ്മേ നംഗ്യേൽ, ജിംഗ്മേ ഉഗ്യോൻ, സോനം യാംഗ്ഡെൻ എന്നിവരാണ് വീട്ടിൽ ഉള്ളത്. ഇതിൽ ഇളയ കുഞ്ഞായ സോനം യാംഗ്ഡെനിന് മാസങ്ങൾ മാത്രമാണ് പ്രായം. കുഞ്ഞിനെ എടുത്ത് പ്രധാനമന്ത്രി താലോലിച്ചു. പ്രധാനമന്ത്രിയ്ക്കൊപ്പം മറ്റ് രണ്ട് പേരും ക്രിക്കറ്റും ഫുട്ബോളും കളിച്ചു. ഈ ചിത്രങ്ങളാണ് ഇപ്പോൾ പുറത്തുവന്നിരിക്കുന്നത്. ആദ്യമായിട്ടാണ് ഒരു ഇന്ത്യൻ പ്രധാനമന്ത്രിയെ ഭൂട്ടാൻ രാജാവ് സൽക്കാരത്തിന് ക്ഷണിക്കുന്നത്.
ഈ മാസം 22, 23 തിയതികളിൽ ആയിരുന്നു പ്രധാനമന്ത്രി ഭൂട്ടാനിൽ എത്തിയത്. ഇന്ത്യ- ഭൂട്ടാൻ ബന്ധം ശക്തിപ്പെടുത്തുന്നതിന്റെ ഭാഗമായിട്ടായിരുന്നു സന്ദർശനം. രാജ്യത്തിന്റെ പരമോന്നത ബഹുമതിയായ ഓർഡർ ഓഫ് ദി ഡ്യൂക്ക് ഗ്യാൽപോ നൽകി പ്രധാനമന്ത്രിയെ ഭൂട്ടാൻ ആദരിച്ചിരുന്നു.
