രജനികാന്തും ലോകേഷും ഒന്നിക്കുന്നു; വമ്പൻ ചിത്രത്തിനായി കാത്ത് പ്രേക്ഷകർ

ചില താരങ്ങളും സംവിധായകരും ഒന്നിക്കുന്നുവെന്ന വാർത്ത മാത്രം മതി ആ സിനിമയ്ക്ക് പ്രീ റിലീസ് ഹൈപ്പ് ലഭിക്കാൻ. രജനികാന്തിനെ നായകനാക്കി ലോകേഷ് കനകരാജ് സംവിധാനം ചെയ്യാൻ പോകുന്ന ചിത്രവും ഈ ഗണത്തിൽ പെട്ടതാണ്. ലിയോയുടെ വൻ വിജയത്തിന് ശേഷം ലോകേഷ് സംവിധാനം ചെയ്യുന്ന ചിത്രത്തിലെ നായകൻ രജനികാന്താണ്. ഇപ്പോഴിതാ
സിനിമയുടെ ചിത്രീകരണം ഉടൻ തന്നെ ആരംഭിക്കുമെന്ന വാർത്തയാണ് പുറത്തുവരുന്നത്.

ചിത്രത്തിൻറെ പ്രീ പ്രൊഡക്ഷൻ ജോലികൾ പുരോഗമിക്കുകയാണ്. ആക്ഷൻ ഡ്രാമ ഗണത്തിൽ പെടുന്ന ചിത്രം രജനികാന്തിൻറെ കരിയറിലെ 171-ാം ചിത്രവുമാണ്. ഇത് തൻറെ സിനിമാറ്റിക് യൂണിവേഴ്‌സിൻറെ ഭാഗമായി വരുന്ന ചിത്രമല്ലെന്നും മറിച്ച് ഒരു സ്റ്റാൻഡ്എലോൺ ചിത്രമായിരിക്കുമെന്നു0 ലോകേഷ് നേരത്തേ സ്ഥിരീകരിച്ചിരുന്നു.

അതേസമയം ടി ജെ ജ്ഞാനവേൽ സംവിധാനം ചെയ്യുന്ന വേട്ടൈയൻ ആണ് രജനിയുടെ അടുത്ത ചിത്രം. അവസാന ഘട്ട ചിത്രീകരണം പുരോഗമിക്കുന്ന വേട്ടൈയന്റെ ഫൈനൽ ഷെഡ്യൂൾ തിരുവനന്തപുരത്ത് ആയിരിക്കും.
സിനിമയുടെ ചിത്രീകരണം തുടങ്ങിയതും തിരുവനന്തപുരത്ത് ആയിരുന്നു. യഥാർഥ സംഭവത്തെ ആസ്പദമാക്കി ഒരുക്കുന്ന ചിത്രമായിരിക്കു0 ഇത്.
റിതിക സിംഗ്, റാണ ദഗുബാട്ടി, ഫഹദ് ഫാസിൽ, മഞ്ജു വാര്യർ എന്നിവർക്കൊപ്പം അമിതാഭ് ബച്ചനും സിനിമയിൽ ഒരു കഥാപാത്രത്തെ അവതരിപ്പിക്കുന്നുണ്ട്. 33 വർഷങ്ങൾക്ക് ശേഷം രജനിയും ബച്ചനും വീണ്ടും ഒന്നിക്കുന്നു എന്നത് ഈ ചിത്രത്തിൻറെ പ്രത്യേകതകളിൽ ഒന്നാണ്. ചിത്രത്തിൽ രജനികാന്ത് പൊലീസ് വേഷത്തിലാണ് എത്തുന്നത്.