ന്യൂഡൽഹി: നികുതിവെട്ടിപ്പിൽ ആദായ നികുതി വകുപ്പിന്റെ നോട്ടീസ് ലഭിച്ചതിന് പിന്നാലെ ബിജെപിയ്‌ക്കെതിരെ വിരട്ടലുമായി കോൺഗ്രസ് നേതാവ് രാഹുൽ ഗാന്ധി. സർക്കാർ മാറുമെന്നകാര്യം എല്ലായ്‌പ്പോഴും ബിജെപിയ്ക്ക് ഓർമ്മ വേണമെന്ന് രാഹുൽ പറഞ്ഞു. നോട്ടീസ് ലഭിച്ചതിന് പിന്നാലെ എക്‌സിലൂടെയായിരുന്നു അദ്ദേഹത്തിന്റെ പ്രതികരണം.
കേന്ദ്രസർക്കാർ മാറുമെന്നകാര്യം എല്ലാവർക്കും ഓർമ്മവേണം. സർക്കാർ മാറിയാൽ ജനാധിപത്യത്തെ കശാപ്പ് ചെയ്തവർക്കെതിരെ ശക്തമായ നടപടി സ്വീകരിക്കും. ആരും ഇനി ഈ തെറ്റ് ആവർത്തിക്കാൻ ധൈര്യപ്പെടാത്ത തരത്തിൽ ആയിരിക്കും ഈ ശിക്ഷ. ഇത് തന്റെ ഗ്യാരണ്ടിയാണെന്നും രാഹുൽ പറഞ്ഞു.
1700 കോടി രൂപയുടെ ആദായ നികുതി വകുപ്പ് നോട്ടീസ് ആണ് കോൺഗ്രസ് പാർട്ടിയ്ക്ക് ലഭിച്ചിട്ടുള്ളത്. ഇന്നലെയായിരുന്നു വകുപ്പ് നോട്ടീസ് നൽകിയത്. നികുതിയും ഇതിന്റെ പലിശയും പിഴയും ചേർത്താണ് ഇത്രയും വലിയ തുക. രണ്ട് വർഷങ്ങളിൽ നടത്തിയ നികുതി വെട്ടിപ്പിലാണ് നടപടി. ആദായ നികുതി വകുപ്പിന്റെ തുടർ നടപടികൾ നിർത്തിവയ്ക്കണം എന്ന് കാട്ടി കോൺഗ്രസ് ഡൽഹി ഹൈക്കോടതിയിൽ ഹർജി നൽകിയിരുന്നു. ഇത് ഹൈക്കോടതി തള്ളി. ഇതിന് പിന്നാലെയാണ് പണം അടയ്ക്കാൻ ആവശ്യപ്പെട്ട് കോൺഗ്രസിന് നോട്ടീസ് നൽകിയത്. നേരത്തെ കോൺഗ്രസിന്റെ ഫണ്ടുകൾ വകുപ്പ് മരവിപ്പിച്ചിരുന്നു. ഫണ്ടില്ലാത്തതിനാൽ കോൺഗ്രസിന്റെ തിരഞ്ഞെടുപ്പ് പ്രവർത്തനങ്ങൾ കേരളമുൾപ്പെടെയുള്ള സംസ്ഥാനങ്ങളിൽ അവതാളത്തിലാണ്.
