ലഖ്നൗ : വേനൽക്കാലം ആയതോടെ ഇന്ത്യയിലെ മിക്ക സംസ്ഥാനങ്ങളിലും ഇപ്പോൾ കടുത്ത ചൂടാണ് അനുഭവപ്പെടുന്നത്. അയോധ്യയിലെ രാമ ക്ഷേത്രത്തിൽ വേനൽക്കാലം വന്നതോടെ രാംലല്ലയുടെ വസ്ത്രങ്ങളിലും മാറ്റങ്ങൾ വരുത്തി. ചൂടുകാലം വന്നതോടെ പ്രകൃതിദത്തമായ പരുത്തി കൊണ്ടുള്ള കൈത്തറി വസ്ത്രങ്ങൾ ധരിച്ച് പ്രജകൾക്ക് മാതൃകയാവുകയാണ് രാം ലല്ലയും.
അയോധ്യയിലെ രാമക്ഷേത്ര ട്രസ്റ്റ് ആണ് രാം ലല്ലയുടെ വസ്ത്രങ്ങളിൽ മാറ്റം വരുത്തിയതായി സമൂഹമാദ്ധ്യമങ്ങളിലൂടെ പങ്കുവെച്ചത്. രാം ലല്ലയുടെ പുതിയ കൈത്തറി വസ്ത്രങ്ങളുടെ ചിത്രങ്ങളും ശ്രീരാമ ജന്മഭൂമി തീർത്ഥ ക്ഷേത്ര ട്രസ്റ്റ് പങ്കുവെച്ചു. പ്രകൃതിദത്ത വർണ്ണങ്ങൾ കൊണ്ട് നിർമ്മിച്ചിട്ടുള്ള ഈ വസ്ത്രങ്ങൾക്ക് കസവ് കൊണ്ടുള്ള അലങ്കാരങ്ങളും നൽകിയിട്ടുണ്ട്.
2024 ജനുവരി 22 നാണ് ശ്രീരാമ ജന്മഭൂമി തീർത്ഥ ക്ഷേത്രത്തിൽ രാം ലല്ലയുടെ വിഗ്രഹത്തിന്റെ പ്രാണപ്രതിഷ്ഠ ചടങ്ങ് പ്രധാനമന്ത്രി നരേന്ദ്രമോദി നിർവഹിച്ചിരുന്നത്. തുടർന്ന് ഇതുവരെ ഏറ്റവും മികച്ച പട്ടു വസ്ത്രങ്ങൾ ആയിരുന്നു ഭഗവാനെ ധരിപ്പിച്ചിരുന്നത്. എന്നാൽ ഇപ്പോൾ ചൂട് കടുക്കുകയും താപനില ഉയരുകയും ചെയ്തതോടെ മൽമൽ കോട്ടൺ കൊണ്ടുള്ള കൈത്തറി വസ്ത്രങ്ങൾ ആണ് രാം ലല്ലക്ക് വേണ്ടി പ്രത്യേകം തയ്യാറാക്കിയിരിക്കുന്നത്.
