ജലക്ഷാമം ഉൾപ്പെടെ പല പ്രശ്നങ്ങളും പൊതുവെ ഗ്രാമങ്ങളിൽ ആളുകൾ നേരിടാറുണ്ട്. എന്നാൽ, സൂര്യപ്രകാശം ഇല്ലാതെ പോയാലുള്ള പ്രശ്നങ്ങൾ ആരെങ്കിലും നേരിട്ടിട്ടുണ്ടോ..? എന്നാൽ സൂര്യപ്രകാശം ഇല്ലാതെ ഒരു ഗ്രാമം മുഴുവൻ ഇരുട്ടിലാണ്ട ഒരു ഗ്രാമമുണ്ട്.
ഇറ്റാലിയൻ – സ്വിസ് അതിർത്തിയിലെ താഴ്വരയിൽ സ്ഥിതി ചെയ്യുന്ന വിഗനെല്ല എന്ന കൊച്ചു ഗ്രാമത്തിലാണ് അത്യപൂർവമായ പ്രതിസന്ധിയുള്ളത്. എല്ലാ വർഷവും മൂന്ന് മാസക്കാലം ഇവിടെ രാപകൽ വ്യത്യാസമില്ലാത്ത ഇരുട്ടായിരിക്കും. എല്ലാ വർഷവും നവംബർ മുതൽ ഫെബ്രുവരി വരെയുള്ള മാസങ്ങളിലാണ് ഇവിടെ ഇരുട്ട് വ്യാപിക്കുന്നത്. അതിന് ഒരു കാരണവുമുണ്ട്.
നാല് വശവും പർവതങ്ങളാൽ ചുറ്റപ്പെട്ട ഗ്രാമമാണ് വിഗനെല്ല. ഇതാണ്് ഇവിടെ ഇക്കാലലം സൂര്യപ്രകാശം ലഭിക്കാതിരിക്കാനുള്ള കാരണം. സൂര്യപ്രകാശം ഇല്ലാത്തത് കാരണം ധാരാളം ആളുകൾ ഇവിടെ നിന്നും മറ്റ് സ്ഥലങ്ങളിലേക്ക് മാറിപോയി. ഇത് വലിയ തോതിൽ ഇവിടെ ജനസംഖ്യ കുറയുന്നതിനും കാരണമായി. ഇതോടെ 1999ൽ അന്നത്തെ മേയർ ഫ്രങ്കോ മിദാലിയാണ് ഈ പ്രശ്നത്തിന് പരിഹാരം നിർദേശിച്ചത്.
മറഞ്ഞു നിൽക്കുന്ന സൂര്യപ്രകാശത്തെ ഭൂമിയിലേക്ക് പതിപ്പിക്കാൻ ഗ്രാമത്തിൽ ഒരു ഭീമൻ കണ്ണാടി സ്ഥാപിക്കാനാണ് ഭരണകൂടം തീരുമാനിച്ചത്. ആർക്കിടെക്ട് ജിയോകോമോ ബോൺസാനിയാണ് ഈ വെല്ലുവിളി ഏറ്റെടുത്തത്. എൻജിനീയർ ജിയാനി ഫെരാരിയുടെ സഹായത്തോടൈ എട്ട് മീറ്റർ വീതിയും അഞ്ച് മീറ്റർ ഉയരവുമുള്ള ഒരു കണ്ണാടി നിർമിച്ചു. 2006ലാണ് കണ്ണാടി ഗ്രാമത്തിൽ സ്ഥാപിച്ചത്. ഇതോടെ കണ്ണാടിയിൽ തട്ടുന്ന സൂര്യപ്രകാശം പ്രതിഫലിപ്പിച്ചുകൊണ്ട് ഗ്രാമത്തിൽ സൂര്യനുദിച്ചു.
മഞ്ഞുകാലത്ത് മാത്രമാണ് ഈ കണ്ണാടി ഗ്രാമത്തിൽ ഉപയോഗിക്കുക. വർഷത്തിലെ ബാക്കി സമയം ഇത് മൂടിയിടും.
Discussion about this post