വയനാട് : എൽഡിഎഫിന് പച്ചക്കൊടി ഒളിച്ചുവെക്കേണ്ട കാര്യമില്ല എന്ന് സിപിഎം നേതാവ് ബൃന്ദ കാരാട്ട്. വയനാട് എൽഡിഎഫ് സ്ഥാനാർത്ഥിയായ ആനി രാജയുടെ തെരഞ്ഞെടുപ്പ് പ്രചാരണ റാലിയിൽ ഐഎൻഎല്ലിന്റെ പച്ചക്കൊടി വീശികൊണ്ടാണ് ബൃന്ദ കാരാട്ട് ഇക്കാര്യം വ്യക്തമാക്കിയത്. സിപിഐയുടെ ചെങ്കൊടി എന്നപോലെ തന്നെ ഐഎൻഎല്ലിന്റെ പച്ചക്കൊടിയും എൽഡിഎഫിന്റെ ഭാഗമാണെന്നും ബൃന്ദ കാരാട്ട് വ്യക്തമാക്കി.
‘എൽഡിഎഫ് ഏറെ ബഹുമാനിക്കുന്ന ഘടകകക്ഷിയാണ് ഇന്ത്യൻ നാഷണൽ ലീഗ്. അതിനാൽ തന്നെ ഐഎൻഎല്ലിന്റെ പച്ചക്കൊടിയും ഞങ്ങളുടെ ഭാഗമാണ്. അത് പുറത്തു കാണിക്കുന്നതിന് യാതൊരു മടിയുമില്ല. എന്നാൽ യുഡിഎഫ് നാമനിർദ്ദേശ പത്രിക സമർപ്പിക്കുമ്പോഴും പ്രചാരണ റാലിയിലും ഘടകകക്ഷിയായ മുസ്ലിം ലീഗിന്റെ പച്ചക്കൊടി ഒളിപ്പിച്ചു വെച്ചത് എന്തിനാണ്?’ എന്നും ബൃന്ദ കാരാട്ട് തിരഞ്ഞെടുപ്പ് പ്രചാരണ റാലിയിൽ ചോദ്യമുന്നയിച്ചു.
വയനാട്ടിലെ സിറ്റിംഗ് എംപിയായ രാഹുൽ ഗാന്ധിക്കെതിരെ രൂക്ഷ വിമർശനമാണ് ബൃന്ദ കാരാട്ട് തിരഞ്ഞെടുപ്പ് റാലിയിൽ ഉന്നയിച്ചത്. കഴിഞ്ഞ അഞ്ചുവർഷമായി വയനാട് ലോക്സഭാ മണ്ഡലത്തിൽ എംപി ഇല്ലാത്ത അവസ്ഥയാണെന്ന് ബൃന്ദ കുറ്റപ്പെടുത്തി. അതിനാൽ തന്നെ ഇത്തവണ വയനാട്ടുകാർക്ക് മുഴുവൻ സമയവും ജനങ്ങൾക്കൊപ്പം ഉണ്ടാകുന്ന എംപി വേണോ അതോ പാർട്ട് ടൈം ആയി പ്രവർത്തിക്കുന്ന എംപി വേണോ എന്നും ബൃന്ദ കാരാട്ട് ചോദ്യമുന്നയിച്ചു.
Discussion about this post