ഇന്ന് സമൂഹമാദ്ധ്യമങ്ങൾ നമ്മുടെ ജീവിതത്തെ വളരെയധികം സ്വാധീനിക്കുന്ന ഒരു കാഴ്ചയാണ് ഉള്ളത്. ജീവിതത്തിന്റെ ഒരു അഭേദ്യമായ ഭാഗം തന്നെയാണ് ഇന്ന് സമൂഹമാദ്ധ്യമങ്ങൾ. പുറംലോകവുമായി സംവദിക്കാനും ബന്ധം സ്ഥാപിക്കാനും നിലനിർത്താനും ഇന്ന് മനുഷ്യകുലം സമൂഹമാദ്ധ്യമങ്ങളെ ഉപയോഗിക്കുന്നു. സമൂഹമാദ്ധ്യമങ്ങളും സൗജന്യമായി ഉപയോഗിക്കാനുള്ള സാഹചര്യം ഉള്ളത് കൊണ്ട് തന്നെ പലരും ഇന്ന് സമൂഹമാദ്ധ്യമങ്ങൾക്ക് അഡിക്ടാണ്. സമൂഹ മാദ്ധ്യമ പ്ലാറ്റ്ഫോമായ എക്സിൽ സേവനങ്ങൾക്ക് പണം ഈടാക്കാനുള്ള പദ്ധതിയുമായി ഇലോൺ മസ്‌ക് മുന്നോട്ടുപോകുന്നുവെന്ന് മുമ്പ് റിപ്പോർട്ടുകളുണ്ടായിരുന്നു. പുതിയതായി അക്കൗണ്ട് തുടങ്ങുന്നവരിൽ നിന്ന് പണം ഈടാക്കാൻ കമ്പനി ഒരുങ്ങുന്നുവെന്നാണ് ഏറ്റവും പുതിയ റിപ്പോർട്ട്. ഇലോൺ മസ്‌ക് തന്നെയാണ് ഇക്കാര്യം സ്ഥിരീകരിച്ചത്.
ബോട്ടുകളും വ്യാജ അക്കൗണ്ടുകൾ തടയുന്നതിനും അതുവഴി എക്സിന്റെ വിശ്വാസ്യത കാത്തുസൂക്ഷിക്കാനുമാണ് പണം ഈടാക്കുന്നത്. ചെറിയ രീതിയിൽ പണം ഈടാക്കിത്തുടങ്ങിയാൽ വ്യാജന്മാർ പിന്നെ ഈ വഴിക്ക് വരില്ലെന്നാണ് മസ്‌ക് കണക്കുകൂട്ടുന്നത്. എക്സിൽ പോസ്റ്റ് ചെയ്യുന്നതിനും ലൈക്ക്, റിപ്ലൈ എന്നിവയ്ക്കുമായിരിക്കും പണം കൊടുക്കേണ്ടിവരിക.
അതേസമയം പുതിയ അക്കൗണ്ടുകളിൽ നിന്ന് മറ്റു പ്രൊഫൈലുകൾ തെരയുന്നതിനോ മറ്റുള്ളവരെ ഫോളോ ചെയ്യുന്നതിനോ അവരുടെ പോസ്റ്റ് വായിക്കുന്നതിനോ പണം കൊടുക്കേണ്ടതില്ല. എന്നുമുതൽ പുതിയ സംവിധാനം തുടങ്ങാനാകുമെന്നതിനെക്കുറിച്ചും എത്ര പണം ഈടാക്കാം എന്നത് സംബന്ധിച്ചൊന്നും മസ്‌ക് വ്യക്തമാക്കുന്നില്ല. അതേസമയം ന്യൂസിലാൻഡ്, ഫിലിപ്പൈൻസ് എന്നിവിടങ്ങിൽ പരിക്ഷണാടിസ്ഥാനത്തിൽ ഇത്തരത്തിൽ പണം ഈടാക്കുന്നുണ്ട്. ഇങ്ങനെ പണം ഈടാക്കിയിട്ടും വ്യാജന്മാരെ എത്രകണ്ട് തുരത്താനായി എന്നത് സംബന്ധിച്ചൊന്നും വ്യക്തമായ റിപ്പോർട്ടുകളില്ല. ന്യൂസിലൻഡിൽ 1.75 ഡോളറാണ് ഈടാക്കിയിരുന്നത്. യുഎസിൽ ഇത് അവതരിപ്പിക്കപ്പെട്ടാൽ 1 യുഎസ് ഡോളർ ആയിരിക്കും നിരക്ക് എന്നാണ് കരുതുന്നത്. അതേസമയം വ്യാജ അക്കൗണ്ടുകളെ കണ്ടെത്തി തുരത്താൻ ഈ മാസം ആദ്യം എക്സിന്റെ കീഴിൽ വൻ ദൗത്യം അരങ്ങേറിയിരുന്നു. ഇതിന്റെ ഫലമായി പല ആളുകൾക്കും ഫോളോവേഴ്സിന്റെ എണ്ണത്തിൽ ഗണ്യമായ കുറവുണ്ടായി. ഇങ്ങനെ കുറഞ്ഞതൊക്കെ വ്യാജ അക്കൗണ്ടുകളായിരുന്നു.
Discussion about this post