പാലക്കാട്: ജില്ലയിൽ സൂര്യാഘാതമേറ്റ് ഒരു മരണം കൂടി. എലപ്പുള്ളി സ്വദേശിനി ലക്ഷ്മി (90) ആണ് സൂര്യാഘാതത്തെ തുടർന്ന് മരിച്ചത്. ലക്ഷ്മിയുടെ മൃതദേഹം സംസ്‌കരിച്ചു.
ഇന്നലെയാണ് ലക്ഷ്മി മരിച്ചത്. വീടിന് സമീപത്തെ കനാലിൽ അവശനിലയിൽ കാണുകയായിരുന്നു. നാട്ടുകാരാണ് വീണു കിടക്കുന്ന ലക്ഷ്മിയെ ആദ്യം കണ്ടത്. ഉടനെ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. വയോധികയുടെ ശരീരത്തിൽ പൊള്ളലേറ്റ പാടുകൾ ഉണ്ടായിരുന്നു. ഇതേ തുടർന്ന് സൂര്യഘാതമേറ്റാകാം മരണകാരണം എന്ന സംശയം ഇന്നലെ തന്നെ ഉയർന്നിരുന്നു. ഇന്ന് നടത്തിയ പോസ്റ്റ്‌മോർട്ടത്തിൽ ഇക്കാര്യം സ്ഥിരീകരിക്കുകയായിരുന്നു. ഒരാഴ്ചയ്ക്കുള്ളിൽ സൂര്യഘാതത്തെ തുടർന്ന് മരിക്കുന്ന രണ്ടാമത്തെ വ്യക്തിയാണ് ലക്ഷ്മി.
നിലവിൽ പാലക്കാട് ജില്ലയിൽ അതിശക്തമായ ചൂടാണ് അനുഭവപ്പെടുന്നത്. 41 ഡിഗ്രി സെൽഷ്യസ് ആണ് താപനില. ഉഷ്ണതരംഗത്തിനുള്ള സാദ്ധ്യതയുൾപ്പെടെ ജില്ലയിൽ ഉണ്ട്.
