തിരുവനന്തപുരം : ഇന്ത്യയുടെ ലോകകപ്പ് ടീമിൽ ഇടംപിടിച്ച സഞ്ജു സാംസണ് അഭിനന്ദനങ്ങളറിയിച്ച് പിതാവ് സാംസൺ വിശ്വനാഥ്. ടീമിൽ ഇടംകെട്ടിയാൽ മാത്രം പോരാ കളിക്കുന്നത് കാണുകയും വേണം എന്നാണ് ആഗ്രഹം എന്നും അദ്ദേഹം അറിയിച്ചു. 10 വർഷം മുൻപേ തന്നെ സഞ്ജുവിന് ഇന്ത്യൻ ടീമിൽ ഇടം ലഭിക്കേണ്ടതായിരുന്നു. എന്നാൽ ഇപ്പോഴാണ് എല്ലാം ശരിയായി ഒത്തു വന്നത് എന്നും സാംസൺ വിശ്വനാഥ് പ്രതികരിച്ചു.
സഞ്ജുവിന് ലോകകപ്പ് ടീമില്‍ ഇടം കിട്ടിയതിൽ വലിയ സന്തോഷമുണ്ട്. എന്നാൽ ടീമിൽ ഇടംകെട്ടിയാൽ മാത്രം പോരാ. പ്ലെയിങ് ഇലവനിൽ കളിക്കാനും കഴിയണം. ഇന്ത്യൻ ടീമിന്റെ 3 ഫോർമാറ്റിലും സഞ്ജു കളിക്കും എന്നാണ് പ്രതീക്ഷ. രാജ്യത്തിനായി അവൻ റൺസ് നേടുന്നത് കണ്ടാലേ ആശ്വാസമാകൂ എന്നും സഞ്ജുവിന്റെ പിതാവ് പ്രതികരിച്ചു.
ഐപിഎല്ലിലെ തകർപ്പൻ ഫോമാണ് സഞ്ജുവിന് ലോകകപ്പ് ടീമിൽ ഇടം പിടിക്കാൻ തുണയായത്. സഞ്ജു നായകനായ ഐപിഎൽ ടീം രാജസ്ഥാൻ റോയൽസ് നിലവിൽ പോയിന്റ് പട്ടികയിൽ ഒന്നാം സ്ഥാനത്താണ് ഉള്ളത്. ശ്രീശാന്തിനു ശേഷം ലോകകപ്പ് ടീമിൽ ഇടം നേടുന്ന മലയാളി താരമാണ് സഞ്ജു സാംസൺ.
