എറണാകുളം: മലയാള സിനിമയിലെ സ്ത്രീകൾ എവിടെയെന്ന ചോദ്യം പങ്കുവച്ച് സംവിധായിക അഞ്ജലി മേനോൻ. സമൂഹമാദ്ധ്യമത്തിലൂടെയായിരുന്നു സംവിധായിക ചോദ്യവുമായി രംഗത്ത് എത്തിയത്. അടുത്തിടെ നായികമാർ ഇല്ലാതെ ഇറങ്ങിയ സിനിമകൾ തിയറ്ററുകളിൽ വൻ വിജയമാകുകയും ഇതിന് പിന്നാലെ നായികയില്ലെങ്കിൽ ചിത്രം ഹിറ്റടിയ്ക്കും എന്ന തരത്തിലുള്ള ചർച്ചകളും ഉയർന്നുവന്നിരുന്നു. ഇതിനിടെയാണ് സംവിധായികയുടെ സമൂഹമാദ്ധ്യമത്തിലൂടെ രംഗത്ത് വന്നത്.
അടുത്തിടെ വൻ വിജയമായ മഞ്ഞുമ്മൽ ബോയ്സ്, ആവേശം, ഭ്രമയുഗം എന്നീ സിനിമകളുടെ പോസ്റ്ററുകൾക്കൊപ്പം വേർ ആർ ദി വിമെൺ ഇൻ മലയാളം സിനിമ ? ( മലയാള സിനിമയിൽ സ്ത്രീകൾ എവിടെ) എന്ന് എഴുതി കൊണ്ടുള്ള പോസ്റ്റ് സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്. ഇതാണ് സംവിധായിക പങ്കുവച്ചത്. ഇൻസ്റ്റഗ്രാമിലെ സ്റ്റോറിയിൽ ആയിരുന്നു സംവിധായിക പോസ്റ്റിന്റെ സ്ക്രീൻഷോട്ട് പങ്കുവച്ചത്. ഇങ്ങിനെയൊരു ചോദ്യം മാദ്ധ്യമങ്ങളിൽ ഉയർന്നതിൽ അതിയായ സന്തോഷം ഉണ്ടെന്നും സംവിധായിക കൂട്ടിച്ചേർത്തു.
ആവേശം എന്ന സിനിമയെ ആസ്പദമാക്കിയാണ് നിലവിൽ സമൂഹമാദ്ധ്യമങ്ങളിൽ ചർച്ച കൊഴുക്കുന്നത്. യൂണിവേഴ്സിറ്റിയുടെ പശ്ചാത്തലത്തിൽ ആണ് സിനിമ നിർമ്മിച്ചിരിക്കുന്നത്. എന്നാൽ സിനിമയിൽ ശക്തമായ സ്ത്രീകഥാപാത്രത്തെ ഉൾപ്പെടുത്തിയില്ല. ചിത്രത്തിലെ അമ്മ കഥാപാത്രം പേരിന് മാത്രമാണെന്നും വിമർശനം ഉയരുന്നുണ്ട്. ഇതുവരെ ഇറങ്ങിയ സിനിമകളിൽ 22 ഫീമെയിൽ കോട്ടയം, ദി ഗ്രേറ്റ് ഇന്ത്യൻ കിച്ചൺ എന്നീ സിനിമകളിൽ മാത്രമാണ് ശക്തയായ സ്ത്രീ കഥാപാത്രങ്ങൾ ഉള്ളതെന്നും പലരും അഭിപ്രായപ്പെടുന്നു.
Discussion about this post