തിരുവനന്തപുരം: 79 ാം പിറന്നാൾ നിറവിലുള്ള മുഖ്യമന്ത്രി പിണറായി വിജയന് ആശംസകളേകി മരുമകനും മന്ത്രിയുമായ പിഎ മുഹമ്മദ് റിയാസ്. കരുത്തിന്റെയും നിശ്ചയദാർഢ്യത്തിന്റെയും പ്രതീകമാണ് പിണറായിയെന്നും ജന്മദിനാശംസകൾ നേരുന്നതായും റിയാസ് കുറിച്ചു. മന്ത്രിമാരും സിനിമാ താരങ്ങളും അടക്കം നിരവധി പേരാണ് മുഖ്യമന്ത്രിയ്ക്ക് ആശംസ നേർന്ന് രംഗത്തെത്തിയത്.
അതേസമയം മുഖ്യമന്ത്രി പിണറായി വിജയന് ഇന്ന് 79ാം പിറന്നാൾ. പതിവുപോലെ ഇത്തവണയും ആഘോഷങ്ങളുണ്ടാകില്ല. രാവിലെ നടക്കുന്ന മന്ത്രിസഭാ യോഗത്തിൽ മുഖ്യമന്ത്രി പങ്കെടുക്കും. പിണറായി വിജയൻ മുഖ്യമന്ത്രിയായിട്ട് ശനിയാഴ്ച എട്ടു വർഷം പൂർത്തിയാവുകയാണ്. ഔദ്യോഗിക രേഖകളിൽ 1944 മാർച്ച് 21 ആണ് മുഖ്യമന്ത്രിയുടെ ജന്മദിനമായി രേഖപ്പെടുത്തിയിരിക്കുന്നത്. എന്നാൽ ശരിയായ ജനനതീയതി മെയ് 24 നാണെന്ന് ഒന്നാം പിണറായി സർക്കാർ അധികാരമേൽക്കുന്നതിന്റെ തലേന്നാണ് പിണറായി വിജയൻ വെളിപ്പെടുത്തിയത്.
1945 മെയ് 24നാണ് കണ്ണൂർ പിണറായി മുണ്ടയിൽ കോരന്റെയും കല്യാണിയുടെയും മകനായി പിണറായി വിജയൻ ജനിച്ചത്. ശാരദാ വിലാസം എൽപി സ്‌കൂളിലും പെരളശ്ശേരി ഗവ. ഹൈസ്‌കൂളിലും തലശ്ശേരി ബ്രണ്ണൻ കോളജിലുമായിരുന്നു വിദ്യാഭ്യാസം.
