ഒരു തവണയെങ്കിലും ഓൺലൈൻ വഴി ഭക്ഷണം ഓർഡർ ചെയ്യാത്തവരായി നമ്മുടെ നാട്ടിൽ ആരും ഉണ്ടാകില്ല. ഭക്ഷണം ഓർഡർ ചെയ്ത് പണി കിട്ടിയവരും നമുക്കിടയിൽ കാണും. അത്തരത്തിൽ പണി കിട്ടിയ ഒരാളുടെ പോസ്റ്റ് ആണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്.
സ്വിഗ്ഗിയിൽ നിന്നും ലൈംസോഡ ഓർഡർ ചെയ്ത വ്യക്തിയാണ് അനുഭവം പങ്കുവച്ചിരിക്കുന്നത്. ഓർഡർ ചെയ്ത് നിമിഷങ്ങൾക്കുള്ളിൽ തന്നെ ഡെലിവറി ബോയ് വീട്ടിലെത്തി. എന്നാൽ, ഓർഡർ തുറന്ന് നോക്കിയപ്പോൾ സീൽ ചെയ്ത ഒഴിഞ്ഞ പ്ലാസ്റ്റിക് ഗ്ലാസ് മാത്രമായിരുന്നു ഇതിനുള്ളിൽ.
യുവാവ് തന്നെയാണ് ഇതിന്റെ ചിത്രമുൾപ്പെടെ ചേർത്ത് എക്സിൽ പോസ്റ്റ് പങ്കു വച്ചത്. ‘എനിക്ക് സീൽ ചെയ്ത ഒഴിഞ്ഞ ഗ്ലാസ് അയച്ചതിന് നന്ദി സ്വിഗ്ഗി. എന്റെ ലൈം സോഡ അടുത്ത ഓർഡറിൽ കിട്ടുമെന്ന് പ്രതീക്ഷിക്കുന്നു’ എന്നാണ് യുവാവ് എക്സിൽ കുറിച്ചത്.
സംഭവത്തിൽ പ്രതികരണവുമായി സ്വിഗ്ഗി തന്നെ രംഗത്ത് എത്തിയിട്ടുണ്ട്. ഇത് വിചിത്രമായി തോന്നുന്നു. നിങ്ങളുടെ ഓർഡർ ഐഡി തരൂ.. തങ്ങൾ ഇതിനെ കുറിച്ച് പരിശോധിക്കാം എന്നും സ്വിഗ്ഗി പ്രതികരിച്ചു.
തനിക്ക് റീഫണ്ട് കിട്ടിയതായും യുവാവ് പറയുന്നുണ്ട്. 120 രൂപയാണ് ലൈം സോഡയ്ക്കായി യുവാവിൽ നിന്നും സ്വിഗ്ഗി ഈടാക്കിയതെന്നും എന്നാൽ, റീഫണ്ടായി വെറും 80 രൂപ മാത്രമാണ് ലഭിച്ചതെന്നും യുവാവ് പറയുന്നു.
Discussion about this post