ചായ… നല്ലൊരു കട്ടൻ ചായ എങ്കിലും കിട്ടാത്ത പ്രഭാതത്തെ കുറിച്ച് നമുക്ക് ഓർക്കാൻ കൂടി കഴിയില്ല അല്ലേ ?ചായ എന്ന രണ്ടക്ഷരത്തിൽ ഒതുങ്ങുന്നതല്ല ചായയുടെ മാഹാത്മ്യം. കട്ടൻചായ, സ്ട്രോങ്, ലൈറ്റ്, മീഡിയം, വിത്ത്, വിത്തഔട്ട്, മസാല, ഇഞ്ചിക്കട്ടൻ,പൊടിച്ചായ, ഔഷധച്ചായ, സുലൈമാനി, ആറ് മലയാളിയ്ക്ക് നൂറ് മലയാളം എന്ന പോലെ എത്ര എത്ര വൈവിധ്യങ്ങളാണ് ചായയ്ക്ക് മാത്രം. അങ്ങനെ ഒന്നോർത്താൽ നമ്മുടെ ജീവിതത്തിന്റെ ഭാഗം തന്നെയാണ് ചായ ലോകത്തിൽ വെള്ളം കഴിഞ്ഞാൽ ആളുകൾ ഏറ്റവും കൂടുതൽ കുടിച്ചു തീർക്കുന്ന പാനീയവും ചായ തന്നെ.
എന്നാൽ ചായ തയ്യാറാക്കുന്ന രീതിയും കുടിയ്ക്കുന്ന രീതിയും അനുസരിച്ച് ഗുണദോഷങ്ങൾ വ്യത്യാസപ്പെടുമെന്ന് അറിയാമോ? ചായ ഒരു വികാരമാണെങ്കിലും അധികമായാൽ ദോഷം തന്നെയാണ്. പലരും പല തരത്തിലാണ് ചായ ഉണ്ടാക്കുന്നത്. വെട്ടിതിളച്ച വെള്ളത്തിലേക്ക് പൊടിയിട്ടും പാലും വെള്ളവും മിക്സ് ചെയ്ത് തിളപ്പിച്ച് അതിലേക്ക് പൊടിയിട്ടും അങ്ങനെ അങ്ങനെ. പൊതുവെ തിളയ്ക്കുന്ന വെള്ളത്തിലേക്ക് പൊടിയിട്ട് അതിലേക്ക് പാലും പഞ്ചസാരയും ചേർക്കുന്നതാണ് രീതി. പക്ഷേ ഇങ്ങനെ തയ്യാറാക്കുന്ന ചായയ്ക്ക് അതിന്റെ ഗുണങ്ങൾ ഇല്ലെന്ന് പറഞ്ഞാൽ വിശ്വസിക്കുമോ? എന്നാലതാണ് സത്യം.
ഈ രീതിയിൽ തയ്യാറാക്കുമ്പോൾ ഇതിന്റെ ഗുണങ്ങൾ ഇല്ലാതാകുകയാണ് ചെയ്യുന്നത്. വെറും നിറമുള്ള പാനീയം മാത്രമാണ് ഇതിലുള്ളത്. ബാക്കിയുള്ളവ ബാഷ്പീകരിച്ച് പോകും. മാത്രമല്ല, നാം ഉപയോഗിയ്ക്കുന്ന വെള്ളം ഹാർഡ് വാട്ടർ ആണെങ്കിൽ ഇതിൽ ഈ ആന്റിഓക്സിഡന്റുകളും മറ്റും ചേർന്ന് ഇത് ശരീരത്തിന് വലിച്ചെടുക്കാൻ കഴിയാതെ വരുന്നു.
ഫിൽട്ടർ ചെയ്ത വെള്ളമാണ് നല്ലത്. തേയിലപ്പൊടിയും കാപ്പിപ്പൊടിയും ഗുണം നൽകണമെങ്കിൽ 85- 90 ഡിഗ്രി തിളച്ച വെള്ളം മതി. കൂടുതൽ തിളച്ചത് വേണ്ട. വെള്ളം തിളപ്പിയ്ക്കുമ്പോൾ ആവി വന്നു തുടങ്ങുമ്പോൾ ഇത് ഓഫാക്കുക. പിന്നീട് 30 സെക്കന്റ് കഴിഞ്ഞ ശേഷം ഇതിലേയ്ക്ക് തേയിലപ്പൊടിയോ കാപ്പിപ്പൊടിയോ ചേർക്കുക. ഇത് അടച്ചു വച്ച് മൂന്നുനാല് മിനിറ്റ് കഴിഞ്ഞ ശേഷം ഊറ്റിയെടുക്കാം.
പാലിലും ഇതേ രീതിയിൽ ചേർക്കുന്നതാണ് നല്ലത്. തിളച്ചു കൊണ്ടിരിയ്ക്കുന്ന വെള്ളത്തിലോ പാലിലോ പൊടികൾ ചേർക്കരുത്. തിളച്ച ശേഷം പൊടികൾ ചേർത്ത് അടച്ചുവച്ച് ഉപയോഗിയ്ക്കണം. തേയിലപ്പൊടിയ്ക്കൊപ്പം പഞ്ചസാര ചേർത്ത് തിളപ്പിയ്ക്കുന്നവരുണ്ട്. ഇങ്ങനെ ചെയ്യുമ്പോൾ പഞ്ചസാരയിലെ രാസവസ്തുക്കൾ ചായ, കാപ്പിയിലെ ആന്റിഓക്സിഡന്റുകളുടെ ഗുണം കളയുന്നുവത്രേ.
Discussion about this post