ലണ്ടൻ: ഭൂമിയിലെ സമുദ്രങ്ങളുടെ നിറം മാറുന്നതായി പഠനം. ബ്രിട്ടൺ ആസ്ഥാനമായുള്ള നാഷണൽ ഓഷനോഗ്രഫി സെന്ററിലെ ഗവേഷകനായ ബി.ബി കേൽ ആണ് നിർണായക പഠനത്തിന്റെ റിപ്പോർട്ട് പുറത്തുവിട്ടിരിക്കുന്നത്. സമുദ്രങ്ങളുടെ നീല നിറം മാറി പച്ചനിറം ആകുന്നുവെന്നാണ് അദ്ദേഹത്തിന്റെ പഠനത്തിലെ കണ്ടെത്തൽ.
നാസയുടെ അക്വ സാറ്റലൈറ്റിൽ നിന്നുള്ള 20 വർഷക്കാലത്തെ വിശദാംശങ്ങളെ അടിസ്ഥാനപ്പെടുത്തിയാണ് പഠനം. 2002 മുതലുള്ള വിവരങ്ങൾ പരിശോധിക്കുമ്പോൾ സമുദ്രോപരിതലത്തിന്റെ നിറത്തിൽ കാര്യമായ മാറ്റ സംഭവിച്ചിട്ടുണ്ടെന്ന് അദ്ദേഹം പറയുന്നു. നീല നിറം പൂർണമായും പച്ച നിറമായി മാറി. ഇപ്പോൾ നഗ്ന നേത്രങ്ങൾ കൊണ്ട്തന്നെ ഈ നിറം മാറ്റം ദൃശ്യമാണെന്നും അദ്ദേഹം പഠനത്തിൽ വ്യക്തമാക്കുന്നു.
ഉഷ്ണമേഖലയിലും, ഉഷ്ണമേഖലയോട് ചേർന്നുള്ള പ്രദേശങ്ങളിലുമാണ് ഈ മാറ്റം കൂടുതലായി സംഭവിച്ചിരിക്കുന്നത്. സമുദ്രങ്ങളിലെ ആവാസവ്യവസ്ഥയിൽ വന്നിരിക്കുന്ന വലിയ മാറ്റത്തെയാണ് ഈ നിറം മാറ്റം സൂചിപ്പിക്കുന്നത്.
കടലിനുള്ളിൽ കാർബണിന്റെ അളവ് വർദ്ധിക്കുന്നതാണ് ഈ നിറം മാറ്റത്തിലേക്ക് നയിച്ചത് എന്നാണ് കേലിന്റെ നിഗമനം.
കടലിൽ പ്രകാശസംസ്ലേഷണം നടത്തുന്ന സസ്യസമൂഹങ്ങളാണ് ഫൈറ്റോപ്ലാങ്ക്ടൺ. കടലിനുള്ളിലെ കാർബണിന്റെ അളവ് കുറയ്ക്കാൻ ഇവ സഹായിക്കുന്നു. അടുത്തിടെയായി ഇവയുടെ പ്രവർത്തനങ്ങളിൽ വലിയ മാറ്റം വന്നിട്ടുണ്ടെന്നും അദ്ദേഹം പഠനത്തിൽ കൂട്ടിച്ചേർക്കുന്നു.
കാലാവസ്ഥയിൽ ഉണ്ടായിട്ടുള്ള മാറ്റമാണ് സമുദ്രത്തിന്റെ ഈ മാറ്റത്തിന് കാരണം ആയത് എന്നാണ് അദ്ദേഹം പഠനത്തിലൂടെ പറഞ്ഞുവയ്ക്കുന്നത്. കാലാവസ്ഥാ വ്യതിയാനം കടലിന്റെ ചൂട് വർദ്ധിക്കുന്നതിന് കാരണമായി. ഇത് കടലിന്റെ ആവാസവ്യവസ്ഥയെ പ്രതികൂലമായി ബാധിക്കുന്ന പ്ലവകങ്ങൾ വർദ്ധിക്കുന്നതിനും കാരണം ആയി.
Discussion about this post