കോഴിക്കോട്: മലയാള സിനിമയിലെ ആർഎസ്എസ് വിരുദ്ധതയ്ക്കെതിരെ തുറന്നടിച്ച് നടനും തിരക്കഥാകൃത്തുമായ മുരളി ഗോപി. തന്റെ സിനിമയിൽ ഇനിയും ആർഎസ്എസ് ശാഖകൾ കാണിക്കുമെന്ന് അദ്ദേഹം പറഞ്ഞു. ഇവിടെ നിലനിൽക്കുന്നതിനായി ഇടതുപക്ഷത്തിന്റെ പിന്തുണ ലഭിക്കാൻ വേണ്ടി ആർഎസ്എസ് ശാഖകളെ കാണിക്കാതിരിക്കാൻ കഴിയില്ലെന്നും അദ്ദേഹം പറഞ്ഞു. സ്വകാര്യ ടെലിവിഷൻ ചാനലിന് നൽകിയ അഭിമുഖത്തിൽ ആയിരുന്നു അദ്ദേഹത്തിന്റെ പ്രതികരണം.
അസഹിഷ്ണുതയ്ക്കെതിരെ സംസാരിക്കുന്ന പലരും അസഹിഷ്ണുത ജീവിതത്തിൽ വച്ച് പുലർത്തുന്നവരാണ് എന്നതാണ് വസ്തുത. ഈ അടുത്ത കാലത്ത് എന്ന സിനിമയിൽ ആർഎസ്എസിന്റെ ശാഖ ഞാൻ കാണിച്ചു. അതിനെതിരെ വിമർശനം വന്നു. ശാഖ കാണിക്കാനേ പാടില്ല എന്നതാണ്. ഞാൻ ജീവിക്കുന്നത് ഒരു ജനാധിപത്യ രാഷ്ട്രത്തിലാണ്. എന്തുകൊണ്ടാണ് ശാഖ കാണിക്കാൻ കഴിയാത്തത് എന്നതിനെക്കുറിച്ച് ഞാൻ ഒരുപാട് ചിന്തിച്ചിട്ടുണ്ട്. എന്തുകൊണ്ടാണ് ഇങ്ങിനെ വരുന്നത് എന്നത് ചർച്ചചെയ്യപ്പെടേണ്ട കാര്യമാണ്.
എല്ലാവരും പറയുന്നത് ശാഖ കാണിച്ചൂ. കാണിച്ചൂ എന്നാണ്. ഇനിയും ശാഖ കാണിക്കും. ആർഎസ്എസുകാരെ മനുഷ്യരായി കണക്കാക്കാതെയാണ് വിമർശനം ഉന്നയിക്കുന്നത്. ഇത് ശരിയല്ല. അവരും മനുഷ്യരാണ്. ഇതാണ് യഥാർത്ഥ ഗാന്ധി ആശയം. ഞാനും വലതുപക്ഷ രാഷ്ട്രീയത്തിന് എതിരാണ്. വിമർശിക്കുന്തോറും ശക്തിപ്രാപിക്കുന്നവരാണ് പ്രതിപക്ഷപാർട്ടികൾ. ഇവിടെ നിലനിൽക്കണം എങ്കിൽ ഇടത് പക്ഷത്തിന്റെ പിന്തുണ വേണം. അതിനായി ശാഖ കണാക്കാതിരിക്കാൻ കഴിയില്ലെന്നും മുരളി ഗോപി വ്യക്തമാക്കി.
Discussion about this post