കോഴിക്കോട്: മലയാള സിനിമാരംഗവുമായി ബന്ധപ്പെട്ട് പുറത്തുവരുന്നത് സിനിമക്കഥകളെ വെല്ലുന്ന കഥകളെന്ന് കോണ്ഗ്രസ് നേതാവ് കെ. മുരളീധരന്. വാതിലില് മുട്ടിയവരുടെ ലിസ്റ്റ് പുറത്തുവിടുന്നതിനെക്കാള് മുട്ടാത്തവരുടെ ലിസ്റ്റ് പുറത്തുവിടുന്നതാണ് നല്ലത്. ഹേമ കമ്മിറ്റി റിപ്പോര്ട്ട് സര്ക്കാര് പൂഴ്ത്തിയത് പലരേയും രക്ഷിക്കാനാണെന്നും അദ്ദേഹം കൂട്ടിച്ചേര്ത്തു.
മോശം കാര്യങ്ങളാണ് മുകേഷിനെതിരെ പുറത്തുവരുന്നത്. മുകേഷിനെ സിനിമാ നയനിര്മാണ കമ്മിറ്റിയില് നിന്ന് ഒഴിവാക്കണം. എംഎല്എ സ്ഥാനം അദ്ദേഹം രാജി വക്കണം. ഇപ്പോള് രാജിവെച്ചാല് മൂന്ന് സ്ഥലങ്ങളില് ഒരേസമയം ഉപതിരഞ്ഞെടുപ്പ് നടത്താമെന്നും മുരളീധരന് പരിഹസിച്ചു.
വാതിലില് മുട്ടിയവരുടെ ലിസ്റ്റ് പുറത്തുവിടുന്നതിനെക്കാള് മുട്ടാത്തവരുടെ ലിസ്റ്റ് പുറത്തുവിടുന്നതാണ് നല്ലത് എന്നും അദ്ദേഹം തുറന്നടിച്ചു. അതാവുമ്പോള് ഒരു പേജില് ഒതുങ്ങും.
സ്ത്രീകള് ഈ മേഖലയില് സുരക്ഷിതരല്ല. അമ്മയുടെ ഭാരവാഹിസ്ഥാനത്തേക്ക് സ്ത്രീകള് വരുന്നതാവും നല്ലത്. സാംസ്കരിക മന്ത്രിയെ എത്രയും വേഗം കാബിനറ്റില്നിന്ന് പുറത്താക്കുന്നതാണ് പിണറായിക്ക് നല്ലത്. അല്ലെങ്കില് സജി ചെറിയാന് പിണറായിയേയും കൊണ്ടേ പോകൂവെന്നും മുരളീധരന് വ്യക്തമാക്കി.
