തിരുവനന്തപുരം: പൃഥ്വിരാജ് സംവിധാനം ചെയ്ത ‘ബ്രോ ഡാഡി’ സിനിമയിലെ അസിസ്റ്റന്റ് ഡയറക്ടർക്കെതിരെ ലൈംഗിക അതിക്രമ പരാതിയുമായി ജൂനിയർ ആർട്ടിസ്റ്റ്. അസിസ്റ്റന്റ് ഡയറക്ടർമാരിൽ ഒരാൾ പീഡിപ്പിച്ച് നഗ്ന ചിത്രങ്ങൾ പകർത്തിയെന്നാണ് പരാതി. സംഭവത്തിൽ പ്രത്യേക അന്വേഷണ സംഘത്തിന് പരാതി നൽകുമെന്നും അവർ അറിയിച്ചു.
സിനിമയുടെ അസിസ്റ്റന്റ് ഡയറക്ടർമാരിൽ ഒരാളായ മൻസൂർ റഷീദിനെതിരെയാണ് ആരോപണം ഉന്നയിച്ചിരിക്കുന്നത്. 2021ൽ ആഗസ്റ്റ് 8ന് ആണ് ഷൂട്ടിംഗ് നടക്കുമ്പോഴാണ് സംഭവം. ചിത്രത്തിലെ വിവാഹ സീൻ ഷൂട്ട് ചെയ്യാനായി മലയാളി അസോസിയേഷന്റെ നിർദേശപ്രകാരമാണ് ഷൂട്ടിംഗ് സ്ഥലത്ത് എത്തിയത്.
വീണ്ടും അവസരം നൽകാമെന്ന് പറഞ്ഞ് മൻസൂർ റഷീദ് വരാൻ പറയുകയായിരുന്നു. ഷൂട്ടിംഗ് സംഘം താമസിക്കുന്ന ഹോട്ടലിൽ തന്നെ താൻ സ്വന്തം നിലയിൽ മുറിയെടുത്തു. മൻസൂർ മുറിയിലെത്തി തനിക്ക് കുടിക്കാൻ കോള തരുകയായിരുന്നു. ഇത് കുടിച്ചതോടെ, തന്റെ ബോദം നഷ്ടപ്പെടുകയായിരുന്നു. പിന്നീട് ഉണർന്നപ്പോഴാണ് പീഡിപ്പിക്കപ്പെട്ട വിവരം മനസിലായതെന്നും പരാതിക്കാരി പറഞ്ഞു.
സുഹൃത്തുക്കളെയും ബന്ധുക്കളെയും വിവരമറിയിച്ചാണ വീട്ടിലേയ്ക്ക് പോയത്. പിറ്റേന്ന് ഇയാൾ തന്റെ നഗ്നചിത്രം അയച്ച് തരുകയും പണം ആവശ്യപ്പെടുകയുമായിരുന്നു. തുടർന്ന് ഹൈദരാബാദ് പോലീസിൽ പരാതി നൽകുകയും ബലാത്സംഗത്തിന് കേസെടുക്കുകയും ചെയ്തിരുന്നു. എന്നാൽ, അതുകൊണ്ട് കാര്യമുണ്ടയില്ല, പിന്നീടും പല തവണ ഈ ചിത്രങ്ങൾ കാണിച്ച് ഇയാൾ പണം വാങ്ങിയിട്ടുണ്ടെന്നും പരാതിയിൽ ജൂനിയർ ആർട്ടിസ്റ്റ് പറയുന്നു.
