വിജയവാഡ; ട്രെയിൻ അപകടത്തിൽ നിന്ന് ആന്ധ്രാപ്രദേശ് മുഖ്യമന്ത്രി രക്ഷപ്പെട്ടത് തലനാരിഴയ്ക്ക്. പ്രളയബാധിത പ്രദേശങ്ങൾ സന്ദർശിക്കുന്നതിനിടെ മധുര നഗർ റെയിൽവേ പാലത്തിലൂടെ സഞ്ചരിക്കുകയായിരുന്നു മുഖ്യമന്ത്രി ചന്ദ്രബാബു നായിഡു.മുഖ്യമന്ത്രിയുടെയും സുരക്ഷാ ഉദ്യോഗസ്ഥരുടെയും തൊട്ടരികിലൂടെയായിരുന്നു ട്രെയിൻ കടന്നുപോയത്. സംഭവത്തിന്റെ ദൃശ്യങ്ങളും പുറത്തുവന്നിട്ടുണ്ട്.
പ്രളയക്കെടുതി അവലോകനം ചെയ്യുന്നതിനായി നായിഡു പാളത്തിലൂടെ നടക്കുമ്പോൾ പെട്ടെന്ന് അതേ ട്രാക്കിലൂടെ ഒരു ട്രെയിൻ വരുകയായിരുന്നു. റെയിൽ ഗതാഗതത്തിനു മാത്രമായി രൂപകല്പന ചെയ്തിരിക്കുന്ന പാലത്തിൽ കാൽനടയാത്രയ്ക്ക് ഇടമില്ല. പെട്ടെന്ന് സുരക്ഷാ ഉദ്യോഗസ്ഥർ അദ്ദേഹത്തെ ഒരു വശത്തേക്ക് മാറ്റി സുരക്ഷിതനാക്കി. വലിയ ദുരന്തമാണ് ഒഴിവായത്.
കഴിഞ്ഞ അഞ്ച് ദിവസങ്ങളായി മുഖ്യമന്ത്രി ചന്ദ്രബാബു നായിഡു പ്രളയബാധിത പ്രദേശങ്ങളിൽ പര്യടനം നടത്തുകയാണ്. പ്രോട്ടോക്കോളുകൾ ലംഘിച്ച് വെള്ളക്കെട്ടിലൂടെ സഞ്ചരിച്ചും എൻഡിആർഎഫ് ബോട്ടുകളിൽ രക്ഷാപ്രവർത്തകർക്കൊപ്പം പോയുമാണ് അദ്ദേഹം രക്ഷാപ്രവർത്തനങ്ങൾ ഏകോപിപ്പിക്കുന്നത്.
