ധമാസ്‌കസ്: വർഷങ്ങളോളം നീണ്ട മൂക്കൊലിപ്പിന് വിദഗ്ധ ചികിത്സ തേടിയെത്തിയ യുവാവിന്റെ പരിശോധനാ ഫലം കണ്ട് ഞെട്ടി ഡോക്ടർമാർ. സിറിയൻ സ്വദേശിയായ 20 കാരനാണ് മൂക്കൊലിപ്പിനെ തുടർന്ന് ചികിത്സ തേടിയത്. യുവാവിന്റെ തലച്ചോറിൽ ചോർച്ചയുണ്ടെന്നാണ് ഡോക്ടർമാരുടെ കണ്ടെത്തൽ.
ആറ് വർഷത്തോളമായി മൂക്കൊലിപ്പിനെ തുടർന്ന് ബുദ്ധിമുട്ടുകയാണ്. യുവാവ്. ഇടയ്ക്കിടയ്ക്ക് തലവേദനയും തലകറക്കവും അനുഭവപ്പെടാറുണ്ട്. സാധാരണ ജലദോഷത്തിന്റെ ലക്ഷണങ്ങൾ മാത്രമാണെന്നായിരുന്നു യുവാവ് ആദ്യം കരുതിയിരുന്നത്. എന്നാൽ മൂക്കൊലിപ്പ് അസഹനീയം ആയതോടെ യുവാവ് ചികിത്സ തേടാൻ തീരുമാനിക്കുകയായിരുന്നു.
തലവേദനയുടെ കാരണം കണ്ടെത്താൽ യുവാവിന്റെ തലയിൽ എക്‌സ റേ ഉൾപ്പെടെ വിശദമായ പരിശോധന നടത്തി. ഇതിന്റെ ഫലം കണ്ടതോടെയാണ് ഡോക്ടർമാർ അമ്പരന്നത്. ആറ് വർഷങ്ങൾക്ക് മുൻപ് യുവാവിന് വാഹനാപകടത്തിൽ തലയ്ക്ക് പരിക്കേറ്റിരുന്നു. ഇത് തലയോട്ടിയിൽ പൊട്ടലുണ്ടാക്കുകയും ഇതോടെ ദ്വാരം രൂപപ്പെടുകയും ചെയ്തു. ഇതുവഴി തലച്ചോറിലെ സെറിബ്രോസ്‌പൈനൽ ഫ്‌ളുയിഡ് പുറത്തേക്ക് ഒലിച്ചിറങ്ങുന്നുണ്ടെന്നായിരുന്നു പരിശോധനയിൽ കണ്ടത്. തലച്ചോറ് ഈ ദ്വാരത്തിനടുത്തേയ്ക്ക് എത്തുന്നതായും പരിശോധനയിൽ കണ്ടെത്തി. ഇതേ തുടർന്ന് അദ്ദേഹത്തെ അടിയന്തിര ശസ്ത്രക്രിയയ്ക്ക് വിധേയനാക്കി.
കാർ അപകടത്തിൽ യുവാവിന് വിശദമായ ചികിത്സ ആവശ്യമായിരുന്നു. എന്നാൽ അപകടനില തരണം ചെയ്തതോടെ ഇയാൾ മറ്റ് ചികിത്സകൾ വേണ്ടെന്ന് പറഞ്ഞ് ആശുപത്രി വിടുകയായിരുന്നുവെന്നാണ് ഡോക്ടർമാർ പറയുന്നത്.
