അമ്പടാ കണ്ടുപിടിക്കില്ലെന്ന് കരുതിയോ?: ബിഎസ്എൻഎല്ലിന്റെ ബുദ്ധി അപാരം തന്നെ; പ്ലാനിൽ വരുത്തിയ മാറ്റം കണ്ടോ?

രാജ്യത്തെ ടെലികോം മേഖലയെ സംബന്ധിച്ചിടത്തോളം ഇത് മത്സരങ്ങളുടെ കാലമാണ്. മുൻപെങ്ങും കണ്ടിട്ടില്ലാത്ത രീതിയിൽ ടെലികോം കമ്പനികൾ ഓഫറുകളുടെ പെരുമഴ തന്നെയാണ് സൃഷ്ടിക്കുന്നത്. സാധാരണക്കാർക്ക് കൂടുതൽ ഉപകാരപ്രദമാകുന്ന റീചാർജ് പ്ലാനുകൾ അവതരിപ്പിച്ചാണ് കമ്പനി ജനപ്രിയമാകുന്നത്. മറ്റ് കമ്പനികളേക്കാൾ കുറഞ്ഞ തുകയിൽ കൂടുതൽ ഓഫർ എന്നതാണ് ബിഎസ്എൻഎൽ മുന്നോട്ട് വയ്ക്കുന്നത്.

ഇപ്പോഴിതാ 485 രൂപയുടെ പ്രീപെയ്ഡ് പ്ലാനിൽ മാറ്റം വരുത്തിയിരിക്കുകയാണ് ബിഎസ്എൻഎൽ. പ്ലാനിന്റെ വാലിഡിറ്റി കുറച്ച് ഡാറ്റ പരിധിയാണ് ഉയർത്തിയിരിക്കുന്നത്. മുമ്പ് 82 ദിവസം വാലിഡിറ്റിയുണ്ടായിരുന്ന ഈ പ്ലാനിൻറെ പരിധി രണ്ട് ദിവസം കുറച്ച് 80 ആക്കി. എന്നാൽ ദിവസവും 1.5 ജിബി ഡാറ്റ നൽകിയിരുന്നത് ഇപ്പോൾ 2 ജിബിയായി ഉയർത്തിയതാണ് ഏറ്റവും ശ്രദ്ധേയം. മുമ്പ് വാലിഡിറ്റി കൂടിയിരുന്നപ്പോൾ ആകെ 123 ജിബിയാണ് ഈ പാക്കേജിൽ ഉപഭോക്താക്കൾക്ക് ലഭിച്ചിരുന്നതെങ്കിൽ ഇപ്പോഴത് 160 ജിബിയായി ഉയർന്നിട്ടുണ്ടെന്നതാണ് ഏറെ ആകർഷകമായ ഒന്ന്. പരിധികളില്ലാത്ത ലോക്കൽ, എസ്ടിഡി കോളുകളും 80 ദിവസത്തേക്ക് പാക്കേജിൽ ലഭ്യമാണ്. 485 രൂപയുടെ ബിഎസ്എൻഎൽ പ്ലാൻ രാജ്യത്തെ എല്ലാ ടെലികോം സർക്കിളുകളിലും ലഭ്യമാണ്.

നേരത്തെ 160 ദിവസത്തെ വാലിഡിറ്റിയിൽ ദിവസവും 2 ജിബി ഡാറ്റയും സൗജന്യ കോളുകളും നൽകുന്ന തകർപ്പൻ പ്ലാൻ കമ്പനി അവതരിപ്പിച്ചിരുന്നു.160 ദിവസത്തെ വാലിഡിറ്റിയുള്ള പാക്കേജിന് 997 രൂപയാണ് ചെലവാകുക. ആകെ 320 ജിബി ഡാറ്റ ഈ കാലയളവിൽ ഒരു ബിഎസ്എൻഎൽ ഉപഭോക്താവിന് ലഭിക്കും. ഇതിന് പുറമേ ദിവസവും 100 സൗജന്യ എസ്എംഎസുകൾ വീതവും കമ്പനി ഓഫർ ചെയ്യുന്നു. അൺലിമിറ്റഡ് വോയിസ് കോളാണ് പാക്കേജിന്റെ മറ്റൊരു പ്രധാനആകർഷണം. ഇതിന് പുറമേ ആകർഷകമായ ഗെയിംസ്,മ്യൂസിക് സേവനങ്ങളും 997 രൂപ പാക്കേജിൽ ബിഎസ്എൻഎൽ വരിക്കാർക്ക് നൽകുന്നു.

അതേസമയം ബിഎസ്എൻഎൽ 4ജി സൈറ്റുകളുടെ എണ്ണം 25,000 പിന്നിട്ടതായി അടുത്തിടെ വാർത്തകൾ വന്നിരുന്നു. ഇപ്പോൾ എത്ര ടവറുകൾ 4യിലേക്ക് മാറിക്കഴിഞ്ഞു എന്ന കൃത്യമായ കണക്ക് എന്നാൽ ബിഎസ്എൻഎൽ പുറത്തുവിട്ടിട്ടില്ല. ഒരു ലക്ഷം 4ജി ടവറുകളാണ് കമ്പനിയുടെ ലക്ഷ്യം.ബിഎസ്എൻഎൽ 4ജി ആസ്വദിക്കാൻ ആദ്യം വേണ്ടത് കൈവശമുള്ള സിം 4ജി ആണോയെന്ന് ഉറപ്പിക്കുകയാണ്.

9497979797 എന്ന നമ്പറിലേക്ക് ഒരു മിസ്ഡ് കോൾ ചെയ്താൽ നിങ്ങളുടെ ബിഎസ്എൻഎൽ സിം 4ജി ആണോയെന്ന് അറിയാനാകും. ‘ഡിയർ കസ്റ്റമർ, യുവർ കറൻറ് സിം സപ്പോർട്ട്‌സ് ബിഎസ്എൻഎൽ 4ജി സർവീസസ്’ എന്ന സന്ദേശം ഉടനടി മെസേജായി ഫോണിലേക്ക് ലഭിക്കും. ഇനി അഥവാ സിമ്മിൽ ബിഎസ്എൻഎൽ 4ജി ലഭിക്കില്ല എന്നാണെങ്കിൽ പെട്ടെന്നുതന്നെ 4ജിയിലേക്ക് അപ്‌ഗ്രേഡ് ചെയ്യാനും കഴിയും. സിം അപ്‌ഗ്രേഡ് ചെയ്യാനായി ഉടൻ തന്നെ അടുത്തുള്ള കസ്റ്റർമർ സർവീസ് സെൻറർ/റീട്ടെയ്‌ലർ ഷോട്ട് സന്ദർശിക്കാനാണ് ബിഎസ്എൻഎൽ കേരള സർക്കിൾ ആവശ്യപ്പെടുന്നത്.