കോഴിക്കോട്: പ്രമുഖ സാഹിത്യകാരൻ എംടി വാസുദേവൻ നായരുടെ വീട്ടിൽ മോഷണം. ലക്ഷക്കണക്കിന് രൂപയുടെ ആഭരണങ്ങൾ കാണാതായി. സംഭവത്തിൽ എംടിയുടെ ഭാര്യ സരസ്വതി നൽകിയ പരാതിയിൽ പോലീസ് കേസ് എടുത്തു.
26 പവൻ ആഭരണങ്ങളാണ് മോഷണം പോയത്. ഡയമണ്ട് ആഭരണങ്ങൾ ഉൾപ്പെടെ ഇതിൽ ഉണ്ട്. കഴിഞ്ഞ ദിവസം സ്വർണം പരിശോധിച്ചപ്പോഴാണ് മോഷണം പോയതായി വ്യക്തമായത് എന്നാണ് സരസ്വതിയുടെ പരാതിയിൽ പറയുന്നത്. കഴിഞ്ഞ മാസം 22 നും 30 നും ഇടയിലാണ് മോഷണം നടന്നതെന്നാണ് സംശയിക്കുന്നത് എന്നും ഇവർ പോലീസിനോട് പറഞ്ഞു. സ്വർണം ബാങ്ക് ലോക്കറിലാണ് സൂക്ഷിച്ചിരുന്നത് എന്നാണ് കരുതിയിരുന്നത്. എന്നാൽ ലോക്കറിൽ ഇതില്ല. ഇതോടെയാണ് ആഭരണങ്ങൾ മോഷണം പോയതായി വ്യക്തമായത്. ഇതോടെ പോലീസിൽ പരാതി നൽകുകയായിരുന്നു.
മൂന്ന് മാല, വള, കമ്മൽ, ഡയമണ്ട് കമ്മൽ, ലോക്കറ്റ്, മരതകം പതിച്ച ലോക്കറ്റ് എന്നിവയാണ് കാണാതെ ആയത്. സംഭവത്തിൽ പോലീസ് വീട്ടുകാരുടെ മൊഴിയെടുത്തു. പ്രദേശത്തെ സിസിടിവി ദൃശ്യങ്ങൾ ഉൾപ്പെടെ പരിശോധിച്ചുവരികയാണ്.
Discussion about this post