ബുർജ് ഖലീഫയുടെ റെക്കോർഡ് നഷ്ടമാകും; ലോകത്തിലെ ഉയരം കൂടിയ കെട്ടിടം ഇനി മറ്റൊന്ന്; ഉയരം ഒരു കിലോമീറ്ററിലേറെ

റിയാദ്: ലോകത്തിലെ ഏറ്റവും ഉയരം കൂടിയ കെട്ടിടം എന്ന ബുർജ് ഖലീഫയുടെ സ്ഥാനം ഇനി നഷ്ടപ്പെടും. ആ സ്ഥാനം പിടിക്കാനൊരുങ്ങുകയാണ് ജിദ്ദയിലെ മറ്റൊരു ടവർ. ലോകത്തിലെ ഏറ്റവും ഉയരം കൂടിയ ടവറിന്റെ നിർമാണം ജിദ്ദയിൽ പുനരാരംഭിച്ചിരിക്കുകയാണ്.

കിങ്ഡം ഹോൾഡിങ് കമ്പനിയുടെ അനുബന്ധ സ്ഥാപനമായ ജിദ്ദ ഇക്കണോമിക് കമ്പനിയാണ് റെക്കോർഡിടാൻ പോവുന്നത്. ഏഴ് വർഷത്തെ ഇടവേളക്ക് ശേഷമാണ് ടവറിന്റെ നിർമാണ പ്രവർത്തനങ്ങൾ വീണ്ടും തുടങ്ങിയിരിക്കുന്നത്. 2013-ലാണ് ടവറിന്റെ നിർമാണം ആരംഭിച്ചത്. നിർമാണം 2028-ൽ പൂർത്തിയാകുമെന്നാണ് പ്രതീക്ഷിക്കുന്നത്.

ഒരു കിലോമീറ്ററിലധികമാണ് ഈ അംബരചുംബിയുടെ ഉയരം. 157 നിലകളിൽ പണികഴിപ്പിക്കുന്ന ഈ ടവറിനെ സൗദിയിലെ ഏറ്റവും പ്രധാനപ്പെട്ട വാസ്തുവിദ്യാ പദ്ധതികളിലൊന്നായാണ് കണക്കാക്കുന്നത്. ടവർ കോംപ്ലക്‌സിൽ ഫൈവ് സ്റ്റാർ ഹോട്ടലുകൾ, സാദാ ഹോട്ടലുകൾ, ടൂറിസ്റ്റ് റിസോർട്ടുകൾ, ഷോപ്പിങ് മാൾ, വ്യാപാര സ്ഥാപനങ്ങൾ, റസിഡൻഷ്യൽ യൂനിറ്റുകൾ, ഓഫീസുകൾ, വിദ്യാഭ്യാസ സ്ഥാപനങ്ങൾ, നിരീക്ഷണ ഗോപുരം, വിനോദ കേന്ദ്രങ്ങൾ എന്നിങ്ങനെ നാനാവിധമായ സംവിധാനങ്ങളാണ് ഈ കെട്ടിടത്തിലുണ്ടാകുക.

63 നിലകളുടെ നിർമാണം ഇതിനോടകം പൂർത്തിയായിട്ടുണ്ട്. 59 എലിവേറ്ററുകളും 12 എസ്‌കലേറ്ററുകളും സ്ഥാപിച്ചുകഴിഞ്ഞു. മുൻഭാഗങ്ങളുടെ നിർമാണവും ഇതിനകം പൂർത്തിയായി. 80 ടൺ സ്റ്റീലും എനർജി ഇൻസുലേറ്റിങ് ഗ്ലാസും കൊണ്ടാണ് മുൻഭാഗം മനോഹരമാക്കിയിരിക്കുന്നത്.

നിർമാണം പൂർത്തിയാകുന്നതോടെ ലോകത്തിലെ ഏറ്റവും ഉയരം കൂടിയ അഞ്ച് ടവറുകളിൽ രണ്ട് ടവറുകളുള്ള ഏക രാജ്യമായി സൗദി അറേബ്യ മാറും. 601 മീറ്റർ ഉയരമുള്ള മക്കയിലെ ക്ലോക്ക് ടവറാണ് രാജ്യത്തെ മറ്റൊരു ഉയരം കൂടിയ ടവർ.

കുറഞ്ഞ താപ ശേഷിയുള്ള ഗ്ലാസ് മുഖങ്ങൾ, മെക്കാനിക്കൽ എയർ കണ്ടീഷനിങ്ങിനെ ആശ്രയിക്കുന്നത് കുറയ്ക്കുന്നതിന് പ്രകൃതിദത്തമായ വായുപ്രവാഹം മെച്ചപ്പെടുത്തൽ, കാർബൺ ബഹിർഗമനം കുറയ്ക്കുന്നതിന് സഹായിക്കുന്ന സുസ്ഥിര നിർമാണ സാമഗ്രികൾ, ഊർജ ഉപഭോഗം കുറയ്ക്കാൻ സഹായിക്കുന്ന നൂതന സാങ്കേതികവിദ്യകൾ ഈ ടവറിന്റെ നിർമാണത്തിന് പ്രയോജനപ്പെടുത്തിയിരിക്കുന്നു. ഉയർന്ന ടവറുകൾ രൂപകല്പന ചെയ്യുന്നതിൽ പ്രശസ്തനായ അമേരിക്കൻ വാസ്തുശില്പി അഡ്രിയാൻ സ്മിത്താണ് ഈ ടവറിന്റെ രൂപകൽപന നിർവഹിച്ചത്.