മുംബൈ: ബോളിവുഡ് താരം സല്മാന് ഖാന് വീണ്ടും വധ ഭീഷണി. മുംബൈ ട്രാഫിക് പോലീസിന് ആണ് ഭീഷണി സന്ദേശം എത്തിയത്. ലോറൻസ് ബിഷ്ണോയി സംഘത്തിലെ ഒരാളാണ് ഭീഷണി സന്ദേശം അയച്ചത്.
5 കോടി രൂപ സല്മാന് ഖാന് നല്കിയില്ലെങ്കില് അദ്ദേഹത്തിൻ്റെ ഗതി അടുത്തിടെ വെടിയേറ്റ് മരിച്ച മഹാരാഷ്ട്ര മുൻ മന്ത്രി ബാബ സിദ്ദിഖിയുടേതിനേക്കാൾ മോശമാകുമെന്ന് സന്ദേശത്തിൽ മുന്നറിയിപ്പ് നൽകി. ‘സൽമാൻ ഖാൻ ജീവിച്ചിരിക്കണമെങ്കിൽ ലോറൻസ് ബിഷ്ണോയിയുമായുള്ള ശത്രുത അവസാനിപ്പിക്കണം. ഇതിനായി 5 കോടി നല്കണം. ഇത് നിസ്സാരമായി കാണരുത്, അല്ലാത്തപക്ഷം സൽമാൻ ഖാൻ്റെ അവസ്ഥ ബാബാ സിദ്ദിഖിയെക്കാൾ മോശമാകും’- സന്ദേശത്തിൽ അറിയിച്ചു. സംഭവത്തിൽ മുംബൈ പോലീസ് അന്വേഷണം ആരംഭിച്ചിട്ടുണ്ട്.
സൽമാൻ ഖാൻ്റെ അടുത്ത സുഹൃത്തും മഹാരാഷ്ട്ര മുൻ മന്ത്രിയുമായ ബാബ സിദ്ദിഖി ഒക്ടോബർ 12 ന് മുംബൈയിലെ ബാന്ദ്രയിലെ മകന്റെ ഓഫീസിന് പുറത്ത് വച്ചാണ് വെടിയേറ്റ് മരിച്ചത്. സംഭവത്തില് പോലീസ് ഇതുവരെ നാല് പേരെ അറസ്റ്റ് ചെയ്തിട്ടുണ്ട്. കഴിഞ്ഞ കുറച്ച് മാസങ്ങളായി ബിഷ്ണോയ് സംഘത്തിൽ നിന്ന് സൽമാൻ നിരന്തരം ഭീഷണി നേരിട്ടിരുന്നു.
Discussion about this post