രാജ്യത്തെ പ്രധാനപ്പെട്ട ഓണ്‍ലൈന്‍ ഭക്ഷണവിതരണ സ്റ്റാര്‍ട്ടപ്പുകളായ സൊമാറ്റോയും സ്വിഗ്ഗിയും ഓര്‍ഡറുകള്‍ക്ക് ഈടാക്കുന്ന പ്ലാറ്റ്‌ഫോം ഫീസ് വീണ്ടും വര്‍ധിപ്പിച്ചിരിക്കുകയാണ്. തിരഞ്ഞെടുത്ത മേഖലകളില്‍ ഇത് ഏഴില്‍നിന്ന് പത്തുരൂപയാക്കി. ഉത്സവസമയത്ത് അധികമായി ഉണ്ടായിവരുന്ന പ്രവര്‍ത്തനച്ചെലവു കണ്ടെത്താനും പ്രവര്‍ത്തനം വിജയകരമായി മുന്നോട്ടുകൊണ്ടുപോകാനും ലക്ഷ്യമിട്ടാണിതെന്നാണ് ഈ ഭക്ഷണവിതരണ ് കമ്പനികള്‍ വിശദീകരിക്കുന്നത്.
2023 ഓഗസ്റ്റില്‍ സ്വിഗ്ഗിയാണ് രണ്ടുരൂപ പ്ലാറ്റ്‌ഫോം ഫീസ് ആദ്യം നടപ്പാക്കിയത്. സൊമാറ്റോയും ഇതു പിന്തുടര്‍ന്നു. ഓരോ ഓര്‍ഡറിനും റസ്റ്ററന്റ് ചാര്‍ജ്, ഡെലിവറി ഫീസ്, ചരക്കു-സേവന നികുതി എന്നിവയ്ക്കുപുറമേയാണ് ഇത് ഈടാക്കുന്നത്.
എന്നാല്‍ മറ്റൊരു കാര്യം പ്ലാറ്റ്‌ഫോം ഫീസിനും ജി.എസ്.ടി. ബാധകമാണ് എന്നതാണ്. അതുകൊണ്ട് ഉപഭോക്താവ് ഈയിനത്തില്‍ 11.80 രൂപ അധികമായി നല്‍കേണ്ടിവരും. പ്ലാറ്റ്‌ഫോം ഫീസ് ഓരോ നഗരത്തിലും വ്യത്യസ്തമായിരിക്കുമെന്നും കമ്പനികള്‍ പറയുന്നു.
