ന്യൂഡൽഹി : കെ സുധാകരനെ ചതിച്ച് കോൺഗ്രസ്. കണ്ണൂരിൽ സീറ്റ് നൽകുമെന്ന വാഗ്ദാനം പാർട്ടി പിൻവലിച്ചു. എംപിമാർ നിയമസഭാ തിരഞ്ഞെടുപ്പിൽ മത്സരിക്കേണ്ട എന്ന മുൻ തീരുമാനം പിന്തുടരാനാണ് ഇപ്പോൾ തീരുമാനിച്ചിരിക്കുന്നത്. നേരത്തെ സുധാകരനെ കണ്ണൂരിൽ സീറ്റ് നൽകാമെന്ന നിലപാട് സ്വീകരിച്ചതിന് പിന്നാലെ കൂടുതൽ എംപിമാർ സീറ്റ് ആവശ്യപ്പെട്ട് രംഗത്തെത്തിയതാണ് തീരുമാനത്തിൽ നിന്നും ഹൈക്കമാൻഡ് പിന്മാറാൻ കാരണമായിരിക്കുന്നത്.
കോൺഗ്രസ് സീറ്റ് നിഷേധിച്ച സാഹചര്യത്തിൽ കെ സുധാകരൻ കണ്ണൂരിൽ സ്വതന്ത്ര സ്ഥാനാർത്ഥിയാകാൻ സാധ്യതയുണ്ട്. നിലവിൽ ന്യൂഡൽഹിയിലുള്ള സുധാകരൻ ഇന്ന് രാത്രിയിലെ വിമാനത്തിൽ കേരളത്തിലേക്ക് തിരിക്കുന്നതാണ്. കോൺഗ്രസ് വിടുമോ എന്നുള്ള കാര്യത്തിൽ അദ്ദേഹം വൈകാതെ തന്നെ തീരുമാനം അറിയിക്കും. സീറ്റ് നൽകുമെന്ന കോൺഗ്രസ് വാഗ്ദാനത്തിന് പിന്നാലെയാണ് ഇന്ന് ഉച്ചയ്ക്ക് നടത്താനിരുന്ന വാർത്താസമ്മേളനം സുധാകരൻ റദ്ദാക്കിയിരുന്നത്. എന്നാൽ അടൂർ പ്രകാശ് ഉൾപ്പെടെയുള്ള എംപിമാർ സീറ്റ് ആവശ്യവുമായി മുന്നോട്ടു വന്നതോടെയാണ് കെ സുധാകരനെ നൽകിയ വാഗ്ദാനം പിൻവലിക്കാൻ കോൺഗ്രസ് ഹൈകമാൻഡ് തീരുമാനിച്ചത്.
