ന്യൂഡൽഹി : ഹരിയാനയിലെയും മഹാരാഷട്രയിലെയും തോൽവികളിൽ നിന്ന് പാഠം പഠിക്കണമെന്ന് കോൺഗ്രസ് അദ്ധ്യക്ഷൻ മല്ലികാർജുൻ ഖാർഗെ. ഉത്തരവാദിത്തം പരിഹരിക്കാനും പോരായ്മകൾ ഇല്ലാതാക്കാനും കടുത്ത തീരുമാനങ്ങൾ എടുക്കേണ്ടതുണ്ട്. അടുത്ത വർഷം നടക്കാനിരിക്കുന്ന ഡൽഹി, ബിഹാ നിയമസഭാ തിരഞ്ഞെടുപ്പുകൾക്ക് തയ്യാറെടുക്കാൻ അദ്ദേഹം ആഹ്വാനം ചെയ്യുകയും ചെയ്തു. ഹരിയാനയിലും മഹാരാഷ്ട്രയിലും കോൺഗ്രസിന്റെ പരാജയം വിശകലനം ചെയ്യാൻ നടന്ന സിഡബ്ല്യുസി യോഗത്തിൽ സംസാരിക്കുകയായിരുന്നു അദ്ദേഹം.
പ്രാദേശിക പ്രശ്നങ്ങൾ മനസിലാക്കി അതിൽ ഇടപെടണം. എപ്പോഴും ദേശീയ നേതാക്കളേയും ദേശീയ വിഷയങ്ങളേയും ആശ്രയിക്കേണ്ടതില്ലെന്നും അദ്ദേഹം വ്യക്തമാക്കി. തിരഞ്ഞെടുപ്പിന് ഒരുവർഷം മുമ്പേയെങ്കിലും പ്രവർത്തനം ആരംഭിക്കണം.
ഞങ്ങൾ അച്ചടക്കം കർശനമായി പാലിക്കേണ്ടത് പ്രധാനമാണ്. എല്ലാ സാഹചര്യങ്ങളിലും നമ്മൾ ഐക്യത്തോടെ നിലകൊള്ളണം. എതിരാളികളുടെ പ്രവർത്തനം ദിവസേന വിലയിരുത്തണം. പരാജയങ്ങളിൽനിന്ന് പാഠം പഠിക്കണം. അച്ചടക്കം പാലിക്കണമെന്നത് നിർബന്ധമാണ്. ഐക്യത്തോടെ നിൽക്കണം. സമയോചിതമായി തീരുമാനം കൈക്കൊള്ളണമെന്നും ഉത്തരവാദിത്വമുണ്ടാവണമെന്നും ഖാർഗെ കൂട്ടിച്ചേർത്തു.
ഈ തോൽവിയിൽ കോൺഗ്രസ് പ്രവർത്തകർ നിരാശരാവരുത്. കോൺഗ്രസ് പാർട്ടിയുടെ വിജയം ഞങ്ങളുടെ വിജയമാണെന്നും പരാജയം നമ്മുടെ പരാജയമാണെന്നും എല്ലാവരും ചിന്തിക്കേണ്ടതുണ്ട്, ഞങ്ങളുടെ ശക്തി പാർട്ടിയുടെ ശക്തിയിലാണ്.’പാർട്ടിയിൽ വലിയ അഴിച്ചുപണികൾ നടത്തേണ്ടതുണ്ട്. പഴയ രീതികൾ പിൻതുടർന്നാൽ പാർട്ടിക്ക് വിജയിക്കാൻ സാധിക്കില്ല എന്നും അദ്ദേഹം പറഞ്ഞു.
ചിലപ്പോൾ നമ്മൾ തന്നെയാണ് നമ്മുടെ വലിയ ശത്രു. പാർട്ടിയെ ശക്തിപ്പെടുത്താൻ താഴേത്തട്ടുമുതൽ എ.ഐ.സി.സി. തലവരെ മാറ്റങ്ങൾ വേണ്ടിവരും. ബൂത്തുതലംവരെ പാർട്ടി ശക്തിപ്പെടുത്തണം. രാത്രിയും പകലും ജാഗ്രതയോടെ തുടരണമെന്നും ഖാർഗെ പറഞ്ഞു. രാഹുൽഗാന്ധി, ജനറൽ സെക്രട്ടറി പ്രിയങ്കാഗാന്ധി, കെ.സി. വേണുഗോപാൽ, ജയറാം രമേശ് എന്നിവരടക്കം നേതാക്കൾ യോഗത്തിൽ പങ്കെടുത്തിരുന്നു.
