ദമസ്‌കസ് ലക്ഷ്യമാക്കി നീങ്ങി സിറിയൻ വിമതർ; ദിവസങ്ങൾക്കുള്ളിൽ നാലാമത്തെ നഗരവും പിടിച്ചെടുത്തു

ദമാസ്‌കസ് : സിറിയയിലെ നാലാമത്തെ വലിയ നഗരവും പിടിച്ചെടുത്ത് സിറിയ വിമതസേന. രാജ്യത്തെ രണ്ടാമത്തെ വലിയ നഗരമായ അലെപ്പോയും തന്ത്രപ്രധാന മേഖലയായ ഹമയും നിയന്ത്രണത്തിലാക്കി വിമതർ മുന്നേറുകയാണ് . ഒരാഴ്ചയ്ക്കിടെ വിമതർ 4 നഗരങ്ങളാണ് പിടിച്ചെടുത്തത്. പ്രസിഡന്റ് ബാഷർ അൽ അസദിന്റെ ഭരണകൂടത്തെ അട്ടിമറിക്കുകയാണ് ലക്ഷ്യമെന്ന് സിറിയയിലെ വിമതർ പറഞ്ഞു.

അതേസമയം, രാജ്യത്തിന്റെ സൈന്യം പ്രധാന കേന്ദ്രങ്ങൾ വിമതർക്ക് കീഴടക്കുന്നത് തുടരുന്നതിനാൽ യുഎഇ, ഈജിപ്ത്, ജോർദാൻ, ഇറാഖ് എന്നിവയുൾപ്പെടെയുള്ള രാജ്യങ്ങളിൽ നിന്ന് അസദ് ഭരണകൂടം ആയുധങ്ങളും രഹസ്യാന്വേഷണ സഹായവും തേടിയതായി റിപ്പോർട്ടുകളുണ്ട്.

ഹോംസ് നഗരംകൂടി വിമതർ പിടിച്ചാൽ മെഡിറ്ററേനിയൻ തീരമേഖലയിൽനിന്ന് തലസ്ഥാനമായ ദമാസ്‌കസ് ഒറ്റപ്പെടും.
ഹോംസ് നഗരത്തിന്റെ അഞ്ച് കിലോമീറ്റർ അടുത്തുവരെ വിമതർ എത്തിയെന്നാണ് യുദ്ധനിരീക്ഷകർ പറയുന്നത്. അതിനിടെ, സംഘർഷം രൂക്ഷമായതോടെ സിറിയയിലെ ഇന്ത്യക്കാർക്ക് വിദേശകാര്യ മന്ത്രാലയം ജാഗ്രതാ നിർദേശം പുറപ്പെടുപ്പിച്ചിട്ടുണ്ട്.

ഇനിയൊരു അറിയിപ്പ് ഉണ്ടാകുന്നതുവരെ സിറിയയിലേക്കുള്ള എല്ലാ യാത്രകളും ഒഴിവാക്കണമെന്ന് വിദേശകാര്യ മന്ത്രാലയം വെള്ളിയാഴ്ച രാത്രി പൗരന്മാർക്ക് നിർദ്ദേശം നൽകി. സിറിയയിലുള്ള ഇന്ത്യക്കാരോട് എത്രയും വേഗം രാജ്യം വിടണമെന്ന് മന്ത്രാലയം ആവശ്യപ്പെട്ടു. നിലവിൽ സിറിയയിലുള്ള ഇന്ത്യക്കാരോട് ഡമാസ്‌കസിലെ ഇന്ത്യൻ എംബസിയുമായി അവരുടെ എമർജൻസി ഹെൽപ്പ്ലൈൻ നമ്പറായ +963 993385973 (വാട്ട്സ്ആപ്പിലും), ഇമെയിൽ ഐഡി hoc.damascus@mea.gov.in എന്നിവയിൽ അപ്ഡേറ്റുകൾക്കായി ബന്ധപ്പെടാൻ അഭ്യർത്ഥിക്കുന്നു.”സാധ്യമുള്ളവർ, ലഭ്യമായ ഏറ്റവും നേരത്തെയുള്ള വാണിജ്യ വിമാനങ്ങളിൽ നിന്ന് പുറപ്പെടാൻ നിർദ്ദേശിക്കുന്നു, മറ്റുള്ളവരോട് അവരുടെ സുരക്ഷയെക്കുറിച്ച് പരമാവധി മുൻകരുതൽ നിരീക്ഷിക്കാനും അവരുടെ ചലനങ്ങൾ പരമാവധി പരിമിതപ്പെടുത്താനും അഭ്യർത്ഥിക്കുന്നു വെന്ന് സർക്കാർ വ്യക്തമാക്കി.

സിറിയൻ പ്രസിഡന്റ് ബാഷർ അൽ ആസാദ് സർക്കാരിനെതിരെ, ടർക്കിഷ് സായുധസംഘടനയായ ഹയാത്ത് തഹ്രീർ അൽ ഷാമിന്റെ നേതൃത്വത്തിലാണ് സായുധ കലാപം നടക്കുന്നത് . വെള്ളിയാഴ്ച 200-ലധികം പേർ കൊല്ലപ്പെട്ടു. 280,000-ത്തിലധികം ആളുകൾ പുതിയ ആക്രമണത്തിൽ പലായനം ചെയ്തു എന്നാണ് റിപ്പോർട്ട് .