രണ്ട് ദിവസത്തെ റഷ്യൻ സന്ദർശനത്തിനായി രാജ്‌നാഥ് സിംഗ് നാളെ പുറപ്പെടും

ന്യൂഡൽഹി: ദ്വിദിന ഔദ്യോഗിക സന്ദർശനത്തിനായി പ്രതിരോധ മന്ത്രി രാജ്‌നാഥ് സിംഗ് ഞായറാഴ്ച റഷ്യൻ ഫെഡറേഷനിലേക്ക് പുറപ്പെടും. സന്ദർശന വേളയിൽ, സൈനിക, സൈനിക സാങ്കേതിക സഹകരണത്തിനുള്ള ഇന്ത്യ-റഷ്യ ഇൻ്റർ ഗവൺമെൻ്റൽ കമ്മീഷൻ്റെ 21-ാമത് യോഗത്തിൽ അദ്ദേഹം സഹ അധ്യക്ഷനാകും.

ഇരു രാജ്യത്തെയും സൈന്യങ്ങൾ തമ്മിലുള്ള ബന്ധങ്ങളും വ്യാവസായിക സഹകരണവും ഉൾപ്പെടെ ഇന്ത്യ-റഷ്യ പ്രതിരോധ ബന്ധത്തിൻ്റെ വൈവിധ്യമാർന്ന വശങ്ങൾ ഇരു നേതാക്കളും സമഗ്രമായി അവലോകനം ചെയ്യുമെന്ന് പ്രതിരോധ മന്ത്രാലയം പുറത്തിറക്കിയ പ്രസ്താവനയിൽ പറഞ്ഞു . പരസ്പര പരിഗണനയുള്ള സമകാലിക പ്രാദേശിക, ആഗോള പ്രശ്‌നങ്ങളെക്കുറിച്ചുള്ള കാഴ്ചപ്പാടുകളും ഇരു രാജ്യങ്ങൾ തമ്മിൽ കൈമാറും.

സന്ദർശനത്തിൻ്റെ ഭാഗമായി, ഇന്ത്യൻ നാവികസേനയുടെ ഏറ്റവും പുതിയ മൾട്ടി-റോൾ സ്റ്റെൽത്ത് ഗൈഡഡ് മിസൈൽ ഫ്രിഗേറ്റായ ഐഎൻഎസ് തുഷിൽ തിങ്കളാഴ്ച കലിനിൻഗ്രാഡിലെ കപ്പൽശാലയിൽ സിംഗ് കമ്മീഷൻ ചെയ്യും. നാവികസേനാ മേധാവി അഡ്മിറൽ ദിനേശ് കെ ത്രിപാഠി ചടങ്ങിൽ പ്രതിരോധ മന്ത്രിക്കൊപ്പം പങ്കെടുക്കും.