ബെംഗളൂരു: കോഴിക്കോട് സ്വദേശിയായ യുവാവ് നല്കിയ ലൈംഗിക പീഡനക്കേസില് സംവിധായകൻ രഞ്ജിത്തിന് ആശ്വാസം. യുവാവിന്റെ പരാതിയിൽ തുടർനടപടികൾ കർണാടക ഹൈക്കോടതി സ്റ്റേ ചെയ്തു. കേസ് തീർപ്പാവുന്ന വരെ തുടർനടപടി പാടില്ലെന്നാണ് കോടതി ഉത്തരവ്.
കേസ് റദ്ദാക്കണം എന്നാവശ്യപ്പെട്ട് രഞ്ജിത്ത് നൽകിയ ഹർജിയിലാണ് ഇടക്കാല ഉത്തരവ്. ജസ്റ്റിസ് എം. നാഗപ്രസന്നയുടെ ബെഞ്ചാണ് കേസിൽ സ്റ്റേ അനുവദിച്ചത്.
2012ൽ ബാവൂട്ടിയുടെ നാമത്തിൽ എന്ന സിനിമയുടെ ചിത്രീകരണത്തിനിടെ തന്നെ ബെംഗളൂരുവിലെ പഞ്ചനക്ഷത്ര ഹോട്ടലിലേക്ക് വിളിച്ചു വരുത്തുകയും അസ്വാഭാവിക ലൈംഗിക പീഡനത്തിന് ഇരയാക്കിയെന്നും ആയിരുന്നു യുവാവിന്റെ പരാതി. തന്റെ ചിത്രങ്ങൾ പകര്ത്തുകയും പലർക്കും അയക്കുകയും ചെയ്തതെന്നും യുവാവ് പരാതിയില് വെളിപ്പെടുത്തിയിരുന്നു. യുവാവിന്റെ പരാതിയില് കോഴിക്കോട് കസബ പോലീസാണ് ആദ്യം കേസ് രജിസ്റ്റര് ചെയ്തത്. തുടര്ന്ന് ബെംഗളൂരുവിലാണ് സംഭവം നടന്നതെന്ന മൊഴിയുടെ അടിസ്ഥാനത്തിൽ കേസ് കർണാടക പോലീസിന് കൈമാറുകയായിരുന്നു.
Discussion about this post