മല്ലപ്പള്ളി: മുടങ്ങിയ ട്രിപ്പിന് 7,500 രൂപ പിഴ അടയ്ക്കാന്‍ ആവശ്യപ്പെട്ടുകൊണ്ടുള്ള മോട്ടോര്‍ വാഹന വകുപ്പിന്റെ നോട്ടീസ് കണ്ട് ഞെട്ടിയിരിക്കുകയാണ് പിക്കപ്പ് ഉടമയായ പദ്മകുമാര്‍. ഇദ്ദേഹത്തിന് സ്വന്തമായി ബസ് ഇല്ലെന്നുള്ളതാണ് വസ്തുത. പാടിമണ്‍ പടപ്പനം പൊയ്കയില്‍ പി ജി പദ്മകുമാറിനാണ്് ട്രിപ്പ് മുടക്കിയതിന്റെ പേരിലുള്ള പിഴ അടയ്ക്കാന്‍ നോട്ടീസ് ലഭിച്ചത്.
മല്ലപ്പള്ളി ജോയിന്റ് ആര്‍ടി ഓഫീസില്‍ നിന്നായിരുന്നു ് ഇ-ചലാന്‍ അയച്ചത്. ടൈം ഷെഡ്യൂള്‍ പ്രകാരം 12.10-ന് മല്ലപ്പള്ളിയില്‍ നിന്ന് പുറപ്പെട്ട് 12.30-ന് കറുകച്ചാലില്‍ എത്തേണ്ടിയിരുന്ന കെ എല്‍ -38 ഡി 8735 രജിസ്ട്രേഷനിലുള്ള ‘തൈപ്പറമ്പില്‍’ ബസ് മതിയായ കാരണം കൂടാതെ സര്‍വീസ് മുടക്കിയെന്നതും ആനിക്കാട് റോഡരികില്‍ യന്ത്രത്തകരാറുകള്‍ ഇല്ലാതെ നിര്‍ത്തിയിട്ടിരിക്കുന്നതായി കാണപ്പെട്ടു എന്നതുമാണ് പിഴ ചുമത്താന്‍ ആസ്പദമായ കുറ്റകൃത്യമായി പറഞ്ഞിരിക്കുന്നത്.
നവംബര്‍ 26-ന് രാവിലെ 10.22-ന് ബസ് നിര്‍ത്തിയിട്ടതായാണ് മല്ലപ്പള്ളി മോട്ടോര്‍ വെഹിക്കിള്‍ ഇന്‍സ്പെക്ടര്‍ രേഖപ്പെടുത്തിയിരിക്കുന്നത്. ഇതോടെ സ്വന്തമായി പിക്കപ്പ് വാഹനം മാത്രമുള്ള പദ്മകുമാര്‍ ആശങ്കയയിലുമായി. എന്നാല്‍ സംഭവിച്ചത് സ്വാഭാവികമായ പിഴവാണെന്നാണ് വിശദീകരണം. വാഹനങ്ങളുടെ രജിസ്‌ട്രേഷന്‍ നമ്പര്‍ അടിസ്ഥാനമാക്കിയാണ് നോട്ടീസ് അയയ്ക്കുന്നത്. അതില്‍ ഏതെങ്കിലും അക്കമോ അക്ഷരമോ തെറ്റിയാല്‍ ഉടമയുടെ വിലാസം തന്നെ മാറിയേക്കാമെന്ന് ജോയിന്റ് ആര്‍ടിഒ വ്യക്തമാക്കി.
Discussion about this post